Ikastolen festa hartzeko irrikitan daude Trebiñun

Irrikitan, horixe aurtengo leloa./ARABA EUSKARAZ
Irrikitan, horixe aurtengo leloa. / ARABA EUSKARAZ

Burgosen administraziopean dagoen Argantzun herriko ikastola txikian antolatu du igande honetan egingo den Araba Euskaraz

Argantzunen irrikitan daude igande honetan, ekainak 17, egingo den Araba Euskaraz festara hurbilduko diren euskaltzaleak hartzeko. Irrikitan jaiak eta aldarrikapena uztartu eta, administratiboki La Puebla de Arganzón Burgos bada ere, Argantzun Euskal Herria dela berresteko eta bertaratuko diren milaka euskal herritarrekin euskalduntasuna partekatzeko. Leloari men eginez, mugak gainditzeko irrikitan daude.

Izan ere, dena prest dutela aurreratzeko egindako agerraldian dioten bezala, «15 urte luze daramatzagu egonkortasuna lortu nahian. Horregatik festa honetan festa eta aldarrikapena batzen dira eta gure ikastolak bizi duen egoera bitxia nabarmendu nahi dugu».

Festari dagokionez, ohiko osagaiak izango ditu: dantza, antzerkia, bertsoak, kontzertuak, puzgarriak, txarangak... Jatekoa eta edatekoa ere ez da faltako. Aurten, dena den, «ohiko bokatez» gain janari berezia eskainiko da gune guztietan: atuna, barazki parrillada, label produktuak eta paella.

Beste berrikuntza garrantzitsu bat garraioari dagokio, tren bereziak egongo baitira Gasteiztik Argantzunera. 5 euroren truke egin ahal izango da joan-etorria, ordutegi honen arabera: Gasteiztik Argantzunera, 10:00etan eta 11:15ean; Argantzundik Gasteiza, 17:00etan eta 17:15ean.

Handitu nahi duen ikastola

Gaztela-Leongo administrazioaren pean kokaturik dagoen ikastola bakarra da Argantzungoa, nahiz eta Gasteiztik oso hurbil egin, 18 kilometrora. Ikastola txikia da, 2003an sortua. Festaren atarian gogoratu dutenez, «11 ikaslerekin hasi zen eta Haur Hezkuntza osoa eskaintzen duenetik 40-50 ikasle mantendu izan ditu urtero-urtero«. Gaur egun 40 ikasleren 33 familiakosatzen dute »Argantzun Ikastolako familia«.

Bere egoera bitxiak aparteko zailtasunak ekartzen dizkio eguneroko lanari. «Izan ere, egunerokotasunean Euskal Herrira begira bagaude ere, Gaztela-Leongo administraziopean egoteak beste errealitate batean gaudela gogorarazten digu behin eta berriz». Testuinguru horretan, «irakasle, familia, udaletxe eta EHIko Elkartasun Kutxaren bultzadarik gabe ezinezkoa zatekeen» ikastolak aurrera egitea.

Eskariari jaramon eginez, Lehen Hezkuntzarako jauzia egitea erabaki dute. «Momentuz, Lehen Hezkuntzako haurrak bilduko dituen eraikina Araba Ofizialean planteatzera beharturik ikusi dugu gure burua», diote, «ekonomikoki bideraezina delako Lehen Hezkuntza Gaztela-Leongo administraziopean kokatzea». Horrenbestez, ikastola Manzanos-Sagastieta herrian eraikitzeko asmoa dute, Argantzundik 5 kilometrora. Eta horretarako bultzada garrantzitsua izango da Araba Euskarazek emango diena.

Temas

Euskera

Contenido Patrocinado

Fotos

Vídeos