'Hanka sozialak' erakutsitako sinergiak, 'hanka politikora'

Eragile ugari elkartu dira Bilbon egindako ekitaldian./KONTSEILUA
Eragile ugari elkartu dira Bilbon egindako ekitaldian. / KONTSEILUA

Iaz abiatutako bideari jarraituz, 2018an euskararen normalizazio prozesuak eman duenaren inguruko irakurketa egin du Kontseiluak Bilbon egindako ekitaldian

2018 balantzea egiterakoan, 'hanka soziala' deitu duenaren «presentzia nabaria» azpimarratu du Paul Bilbao Kontseiluko idazkari nagusiak. Nafarroan 'Behingoz' lelopean egindako mobilizazioa, euskaraz bizitzeko tresna eta espazio berriak eta Euskaraldia aipatu ditu, besteak beste, horren adibide gisa. Euskaraldiak, Bilbaoren hitzetan, «Euskal Herri osoko eragile sozialek, sindikalek, instituzionalek, politikoek eta euskalgintzak aktibaziori begirako urratsa egiteko balio du», eta «aliantza berri eta berritzaileak sortzeko« ere bai.

Aurten erakundearentzat mugarri izan diren gertaeren artean aipatu du, berriz, Protokoloaren Euskal Herriko Garapena aurkeztu izana. Izan ere, Hizkuntza Eskubideak Bermatzeko Protokoloak jasotzen dituen 185 neurriak euskarara ekartzeko ariketa egin da eta helburua «hizkuntza-politiken inguruko proposamena adostasun sozial zabalarekin osatzea izan da» azaldu du. Adostasun horretan urrats gehiago egitea proposatu du, «hanka sozialean erakutsitako sinergiak hanka politikora» eramanda.

«Euskal Herriko hizkuntza-politik(et)an akordioak sortzen» izango da, hortaz, 2019 urteko jarduera gidatuko duen printzipioa. Etorkizuneko estrategia hori irudikatzeko lagungarria izan zaio Kontseiluari, Bilbaok azaldu duenez, Eusko Ikaskuntzak mendeurrenaren harira antolatutako kongresuaren Euskararen Etorkizuneko Estrategiak Elkarrekin Eraikitzeko mintegirako «ekarpen propositiboa prestatu beharrak».

Zeharkakotasunaren beharra

«Ekarpen horretan adierazi bezala, bada garaia administrazioko sail eta maila guztietan eraginez, benetako zeharkakotasunez garatuko diren hizkuntza-politikak abiatzeko Euskal Herri osoan; bada garaia instituzioen eta euskalgintzako eragileen arteko konplizitatez eraikiko den eta hizkuntza-eskubideen bermea ardatz izango duen hizkuntza-politika abian jartzeko«, esan du Bilbaok. Izan ere, Kontseilua sinetsita dago bide horrek »aukerak zabalduko dituela eragile desberdinen lankidetza-marko zehatzak definitzeko eta aurrera eramateko«.

Horretan jarriko ditu, beraz, indarrak, 2019an. Hori lortzeko lehen harria jarri du Kontseiluak, arestian aipatutako Hizkuntza Eskubideak Bermatzeko Protokoloaren Euskal Herriko Garapena, alegia. Dena den, kontziente da Kontseilua «akordioen dinamiken konplexutasunaz», baina Bilbaok uste du lorgarriak diren akordioekin hastea giltzarria izango dela.

Eremu batzuetan urrats zehatzak egin daitezkeela ere uste du Kontseiluak, tartean «hezkuntzan, teknologia berrietan, hedabideetan...» zehaztu du Bilbaok eta gaineratu du: «Gai izan gara eremu horietako hizkuntza-politiketan lehentasunak definitzeko, baita gure ekarpen praktikoa zehazteko ere. Beraz, hurrengo urratsa akordio horiek eragile instituzionaletara hedatzea da, arlo horietako hizkuntza-politiketan jauzia egiteko».

Eta, eremu horien artean lehentasunezkoa hezkuntza dela azpimarratu du: «Egun badago euskalgintzaren, hezkuntzako eragileen eta eragile sindikalen arteko adostasun handia belaunaldi berriak euskaldunduko dituen hezkuntza-eredua abian jartzeko. Uste dugu, aukera errealak daudela esparru horretan beharrezko jauzia egiteko, eta akordio bidezko estrategia lagungarria dela uste dugu», argitu du idazkari nagusiak.

Temas

Euskera
 

Fotos

Vídeos