Finalerako prest Nafarroan

Zortzi finalistak, Anaitasunan/Bertsozale Elkartea
Zortzi finalistak, Anaitasunan / Bertsozale Elkartea

Eneko Lazkoz, Xabier Terreros, Joanes Illarregi, Eneko Fernandez, Julio Soto, Xabat lllarregi, Julen Zelaieta eta Xabi Maia lehiatuko dira Nafarroako Bertsolari Txapelketan; Joxema Leitza Razkinek jantziko dio txapela garaileari

DVDonostia

Nafarroako Bertsolari Txapelketa iritsi da bere azken geltokira, Tuteratik Urdazubira, Iruritatik Lizarrara, Atarrabiatik Etxarri Aranatzera eta Lesakatik Iruñera, Nafarroaren berdeak, horiak eta gorriak zeharkatu eta gero. Iruñeko Anaitasuna kiroldegian itsasoratuko dira bide horretako urak, finalean. Itxita dago parte hartuko duen zortzikoa. Joxema Leitza Razkinek jantziko dio txapela garaileari.

Martxoaren 23an jokatuko da, 17:00etan hasita, finala. 30 bertsolarik eman zuten izena 44. Nafarroako Bertsolari Txapelketan, eta aurre-kanporaketak igarota, 24 izan ziren Tuteran hasitako ibilbidean. Final-laurdenen eta finalaurrekoen ostean, zortzi dira finalera iritsi direnak. Horiek izango dira txapelaren bila ariko direnak: Eneko Lazkoz, Xabier Terreros, Joanes Illarregi, Eneko Fernandez, Julio Soto, Xabat lllarregi, Julen Zelaieta eta Xabi Maia. Fernando Anbustegi izango da ekitaldiko aurkezlea, eta Alaitz Rekondo ariko da gaiak jartzen.

Iruñeko Anaitasuna kiroldegian jokatuko dute finala. Nafarroako Bertsozale Elkarteak Iruñeko Udalaren laguntza izan du saioaren antolakuntzan. Zortzi bertsolari ariko dira oholtza gainean, finalaurrekoetako saio bakoitza irabazitako hiru bertsolariak, eta puntuazioaren araberako hurrengo bostak.

Finalak bi atal izango ditu. Lehen atala zortzi bertsolariek jokatuko dute. Bigarren atalera, aldiz, lehen atalera puntuaziorik altuena lortzen dutenak pasako dira, eta haiek jokatuko dute buruz burukoa. Bi atalak batuta puntuaziorik altuena lortzen duen bertsolariak jantziko du txapela.

Temas

Euskera