Errioxako Ardoaren eta Mahastien Paisaia munduko ondare izateko hautagaitza sustatuko dute Euskadi, Nafarroa eta Errioxak

2016tik ari dira lanean hautagaitza formulatzeko/Justo Rodriguez
2016tik ari dira lanean hautagaitza formulatzeko / Justo Rodriguez

Lankidetza protokoloak adituen talde bat sortzea aurreikusi du, proposamen berriaren txosten teknikoa prestatzeko. Gobernu bakoitzak izendatuko ditu adituen taldeko ordezkariak

DVDonostia

Eusko Jaurlaritzak, Nafarroako Gobernuak eta Errioxako Gobernuak adostu dute elkarrekin sustatzea Errioxako Ardoaren eta Mahastien Paisaia munduko ondare izendatzeko hautagaitza. Horretarako, hiru gobernuek lankidetza protokoloa sinatuko dute, eta Jaurlaritzako Gobernu Kontseiluak astearte honetan eman dio oniritzia.

Testu horretan, hiru gobernuek lehen aldiz agertu dute borondatea jendaurrean Errioxako Ardoaren eta Mahastien Kultur Paisaiaren hautagaitzarako proposamen berria elkarrekin prestatzeko. Unescoren munduko ondarearen zerrendan sartzeko nahia adierazi dute eta, horrela, 2016tik adituen talde bat hautagaitza formulatzeko egiten ari den lanari segida eta sustapena eman diote.

Errioxako Ardoaren eta Mahastien Kultur Paisaiaren hautagaitza 2015ean aurkeztu zitzaion Unescoren Mundu Ondarearen Batzordeari. Mundu ondarearen zerrendan sartzea geroratzeko erabakia hartu zuen erakundeak, eta, horrela, hautagaitza berriro formulatzeko aukera zabalik utzi zuen, berriro ebaluatzeko.

Jaurlaritzak astearte honetan onetsitako protokoloak adituen talde bat sortzea aurreikusi du, proposamen berriaren txosten teknikoa prestatzeko. Gobernu bakoitzak izendatuko ditu adituen taldeko ordezkariak. Era berean, gobernu bakoitzeko hiru ordezkarik eratuko duten erakundeen arteko batzordea sortzea ere aurreikusi du testuak, gobernuek hautagaitza berrian izango duten parte hartzea koordinatzeko.

Temas

Euskera