Industria nola babestu erakusteko zibersegurtasun jardunaldia egin dute

Industria nola babestu erakusteko zibersegurtasun jardunaldia egin dute
Irekia

Lanbide Heziketako zuzendariak kontzientziatzeko jardunaldia egin du Zibersegurtasunaren Euskal Zentroak

DVDonostia

Zibersegurtasunaren Euskal Zentroak kontzientziazio jardunaldi bat antolatu du ostegun honetan, Lanbide Heziketako langileei zuzenduta, Eusko Jaurlaritzako Hezkuntza Sailarekin batera. Lanbide Heziketa zentroetako zuzendariak izan dira topaketan, eta zibersegurtasunaren egungo egoera Euskadin, esku artean dauden aukerak eta etorkizunera begirakoak eta, batez ere, Lanbide Heziketak profesional kualifikatuak prestatzeko orduan dauka egiteko garrantzitsua aztertu dituzte.

Jardunaldia bukatzeko, Zibersegurtasunaren Euskal Zentrora bisita egin dute parte hartzaileek, Arabako Parke Teknologikoan. Bertan azaldu zaie zein den zentroaren egitekoa eta nola lagun dezakeen zibermehatxuen aurrean prestatuago dagoen gizarte bat egiten, zentroko arduradunek jakinarazi dutenez.

Zibersegurtasunaren Euskal Zentroaren arabera, ziberkrimena negozio profesionalizatu bihurtu da azken urteetan. Hori horrela izanik, erabiltzen diren teknika, taktika eta prozedurak etengabe garatzen ari dira, eta horrek asko zailtzen du zibersegurtasun arloko langileen lana.

Etekin ekonomikoak lortzeko asmoz, zibergaizkileak lehen aritzen ez ziren esparruetan ere sartzen ari dira, hala nola industrian. Beraz, gaur egun eskaera handia dago sektore horretako profesionalen aldetik, eta, aurreikuspen guztien arabera, joera hori mantendu egingo da.

Egoera horri erantzun ahal izateko, Eusko Jaurlaritza hainbat ekimen babesten ari da, bestelako erakunde publiko eta pribatu batzuen bidez, adingabeen zibersegurtasun arloko bokazioa sortzeko. 2018an, Hezkuntza Sailak eta Zibersegurtasunaren Euskal Zentroak arlo horretako prestakuntza programa bat jarri zuten martxan. Helburua da irakasleek alderdi horiek beren informatika programetan txertatzea, ikuspuntu praktiko batetik. Horrela, ikasle horiek baliabide gehiago izango dituzte lan merkatuan.

Era berean, zentroak 'CyberHaurrak' izeneko programa ere garatu du. Horren baitan, adingabe, irakasle eta guraso elkarteei zuzendutako kontzientziazio jardunaldiak ematen dira, eta lanbide heziketako zentroekin zuzenean lan egiten da, esaterako: Maristak-Durango ikastetxearekin, IES Xabier Zubiri Manteo BHIrekin eta IES UNI Eibar-Ermuarekin. Asmoa da ekimen horietan dabiltzan ikasleen lan aukerak erraztea.

Temas

Euskera