Ikasturte hasierako jaia egin dute Baionako Bernat Etxepare lizeoan

lLanbide heziketa ere eskaintzea ahalbidetu dute/Irekia
lLanbide heziketa ere eskaintzea ahalbidetu dute / Irekia

Bernat Etxepare lizeoa 1990. urtean sortu zen, eta 18 urtera arte euskara hutsean ikasteko aukera eskaintzen duen Iparraldeko lizeo bakarra da

DVDonostia

Baionako Bernat Etxepare Lizeoan egin dute jaia. Ikastolen Elkarteko ikasturtearen hasiera ekitaldia egiteaz gain, ikastetxe horren eraikin berria inauguratzeko eta Seaska Iparraldeko ikastolen federazioaren 50. urteurrena ere ospatzeko baliatu dute hitzordua.

Eleaniztasuna belaunaldi gazteenentzat «indargune» bilakatzeak duen garrantzia nabarmendu du, bertan, Bingen Zupiria Kultura eta Hizkuntza Politikako sailburuak, bai eta euskararen ezagutza eta erabilera sustatzeak duena ere. Zupiria pozik agertu da Iparraldeko ikastolek azken hamarkadetan bizi izan duten bilakaera positiboagatik. 50 urte igaro dira Iparradeko lehen ikastola sortu zenetik, eta gaur Seaskak 37 ikastetxe eta 4.000 ikasle ditu lurralde honetan.

Halaber, sailburuak egungo erronkei buruz hitz egin du, hezkuntzaren ikuspegitik zein euskararen ikuspuntutik: «Egungo aldiak eta gizarteak zailtasun eta erronka berriak dakartza, bai hezkuntzaren ikuspegitik bai hizkuntzaren ikuspuntutik. Hezkuntzaren ikuspegitik, eskatzen du egungo gizarte digital eta bizkor honetan biziko diren pertsonak trebatzea».

Aldi berri honek eskatzen du, gaineratu du, «gizon eta emakumeen arteko berdintasuna bermatuko duen formakuntza ematea gure gazteei. Eta eskatzen du datorkigun mundu berri eta nahasian burujabe eta arazoei aurre egiteko gai izango diren herritar trebeak formatzea. Bestalde, hizkuntzaren ikuspegitik ere erronka handiak ezartzen dizkigu aldi berri honek. Alde batetik, eskatzen digu gure mundu berrian dagoen hizkuntzen aniztasuna zaintzea eta aniztasun hori gure gazteentzat indargune bihurtzea. Eta, bestetik, eskatzen digu aniztasun horretan euskarak izan behar duen tokia zaintzea eta bermatzea, bai hizkuntza gaitasunaren ikuspegitik bai erabileraren ikuspegitik».

Gaurko ekitaldian, besteak beste, Alain Rousset Akitania Berriko presidenteak, Jean Beñat Arrabit Euskararen Erakunde Publikoko presidenteak, Peio Jorajuria Seaskako presidenteak eta Koldo Tellitu Ikastolen Federazioko presidenteak ere parte hartu dute.

Bernat Etxepare lizeoa 1990. urtean sortu zen, eta 18 urtera arte euskara hutsean ikasteko aukera eskaintzen duen Iparraldeko lizeo bakarra da. Azken urteetan berrikuntza nabarmena izan du, eta gaur amaitu da eraikin berriaren inaugurazioarekin. Berrikuntza horrek bere hezkuntza eskaintzari ere heldu dio, eta lehen aldiz lanbide heziketa ere eskaintzea ahalbidetu du.

Temas

Euskera