Euskal sorkuntza kulturala, feminismotik berrantolatuta

Kultur esparru bakoitzaren bilakaeraren berri emango da, genero-ikuspegia zehar-lerro gisa hartuta/DV
Kultur esparru bakoitzaren bilakaeraren berri emango da, genero-ikuspegia zehar-lerro gisa hartuta / DV

Kultur logikak eta genero-logikak harremanetan jarriko dituzte. Ekainaren 5era arte eman daiteke izena 'Euskal Kultur Sorkuntza eta kritika feminista. Ikerketa, Irakaskuntza eta Kudeaketa' graduondokoan

DVDonostia

Euskal kultur sorkuntzari begirada kritiko eta feminista luzatuko dion graduondokoa sortu dute Euskal Herriko Unibertsitateak (UPV/EHU) eta Udako Euskal Unibertsitateak (UEU). Euskarazko kultur sorkuntza izango dute aztergai, feminismotik betiere. Urtebeteko iraupena izango du. Ekainaren 5era arte eman daiteke izena 'Euskal Kultur Sorkuntza eta kritika feminista. Ikerketa, Irakaskuntza eta Kudeaketa' graduondokoan.

Urrian ekingo diote euskal kultur sorkuntzaren ikuspegi garaikidea eta askotarikoa jorratuko duen graduondokoari. Kultur logikak eta genero-logikak harremanetan jarriko dituzte, arte plastikoa, arte eszenikoak, bertsolaritza, literatura, musika, komikia eta zinemaren bidez, besteak beste. Nolanahi ere, euskal kultur sorkuntzaren ikuspegi garaikide hori eskaintzeko, ibilbide historikoari ere erreparatuko zaio, eta kultur esparru bakoitzaren bilakaeraren berri emango da, betiere genero-ikuspegia zehar-lerro gisa hartuta.

Kultur bitartekaritzan diharduten hiru eragile mota elikatzea izango du jomugan graduondokoak, eta hasierako ikasgai zein moduluetan elkarrekin arituko badira ere, azkenekoan, laugarrenean, ikerketa moduluan ikertzaileak edo kultur kritikariak trebatuko dira, esparru akademikoan Kultur Ikerketak eta Genero Ikerketak uztartzeko; kudeaketa moduluan kultur teknikariak edo kultur kudeatzaileak trebatuko dira, kultur kudeaketan genero-ikuspegia zehar-lerro bilakatzeko aukerez jabetzeko; eta irakaskuntza moduluan Derrigorrezko Bigarren Hezkuntzako eta Batxilergoko irakasleei zein formazio ez-arautuan dabiltzan hezitzaileei adin tarte horretako gazteak kultura ez sexistan hezteko baliabideak eskainiko zaizkie.

Graduondokoa ikasitako lagunak kultur bitartekaritzan edo kultur ikerketan prestakuntza berezitua izango duten profesionalak izango dira, genero-ikuspegia eta euskal kultur sorkuntza zehar-lerro gisa garatzeko trebakuntza izango dutenak. Beraz, ikerketa, heziketa eta kudeaketa esparruetan lan aukerak izango dituzte, profil horietako lanpostuak betetzeko.

Gradua edo diplomatura duten eta kultur bitartekaritzaren edozein esparrutan (ikerketa, irakaskuntza, kazetaritza, kultur zerbitzuak, kultur politikak, politika feministak...) lan egingo duten mota askotako ikasleak eta baita profesionalak ere onartuko dira.

Temas

Euskera