Eskaintza zabala prestatu du udaberrirako UEUk

Eskaintza zabala prestatu du udaberrirako UEUk

Hamabost ikastaro egingo dira, horietako bost online

EL DIARIO VASCO

Izenean eta izanean uda kutsua izan arren, Udako Euskal Unibertsitateak urte osoko jarduera du. Udaberria, hain zuzen, sasoi altua da ikastaro eskaintzari dagokionez. Aurtengorako hamabost prestatu ditu, horietako bost online, etxetik eta ordutegiaren mugarik gabe egin daitezkeenak.

Internet bidezko eskaintzari dagokionez, ikastaroak gai desberdinei buruzkoak badira ere, ordu kopuru bera dute denek -20 ordu-, eta matrikula-prezioa ere berdina da: 140 eurokoa orokorra; 126 eurokoa ikasle, langabe eta erretiratuentzat eta 105 eurokoa bazkide direnentzat. Denetan dago zabalik izena emateko epea, gehienetan hilaren 27an amaitzen dena. Euskal Herriko ekonomia eta gizarte azterketarako lanabesak. GIS librea da ikastaroetako bat, Gaindegia GEuskal Herriko ekonomia eta gizarte garapenerako behategiarekin batera antolatua. Geografia Informaziorako Sistemak (GIS) lurraldearen gaineko azterketak burutzeko ezinbestekoak bihurtu dira, eta askok baliatu ditzakete euren lanerako: analisi sozioekonomikoak egin beharrean diren ikasle, ikertzaile eta profesionalak, soziologoak, geografoak, ekonomilariak, kazetariak. Euskal Literaturaren irakaskuntza Bigarren Hezkuntzan, berriz, irakasleei zuzentzen zaie nagusiki, baina irakurketa literarioan trebatu nahi duenarentzat ere ikastaro baliagarria da. Hezkuntzaren alorreko profesionalak dira, halaber, Moodle-ren oinarrizko erabilera ikastaroa egiteko hautagai nagusiak, hezkuntza-testuinguru guztietan erabiltzen ari den eta gero eta zabalkunde handiagoa duen Moodle ikasgela birtualak sortzeko web aplikazio ezaguna baita. Nola sortu eta saldu liburu elektronikoak ikastaroaren kasuan, izena emateko epea hilaren 20an amaitzen da, datorren ostiralean. Bereziki beren edukian zabaltzeko bideak bilatzen ari diren sortzaileei zuzendutako ikastaroa Elhuyarrekin elkarlanean antolatu du UEUk. Ikastaroan ikasleek prozesu osoa egiten ikasiko dute: eskuizkribua, on-lineko autore bihurtu, on-line saldu, eta publizitatea egin. Hasten aurrena hauxe da, martxoaren 2an abiatuko baita. Martxoan hasiko da halaber, hilaren 10ean, Ordenagailuz lagundutako itzulpena: hainbat aukera ikastaroa. Honako hau bere ohiko jardueran itzulpenak egiten dituen edozein profesionalentzat da.

Ikasgelako hamar ikastaroak ere askotarikoak dira gaiei eta jakintza alorrei dagokienez: Argazki-edizioa; Argazkigintza dokumentala; Emozioak eta norberaren gaitasunen lanketa sakontzen; Eskola libre eta demokratikoak: gizarte aldaketarako tresna eta gako; Gazteak, sexua eta sare sozialak; Haur-psikologia: gaurko haurrak etorkizuneko helduak; Zu irabazle, ni irabazle: gatazkak ikasgai bihurtuz;NoSQL datu.baseak. MongoDB; Sendabelarrak eta etnobotanika Euskal Herrian: jakituria tradizionaletik pentsamendu zientifikora eta Yoga eta kontzentrazioa eskolan dira argazkian azaltzen den Eibarko Markeskoan ez ezin Gasteizko Oihaneder Euskararen Etxean egingo diren ikastaroak. Guztiei buruzko informazio zehatza UEUren web gunean aurki daiteke.

 

Fotos

Vídeos