Donostiako Udalak 2018ko Gizarte Larrialdietarako Laguntza kopuruen memoria aurkeztu du

Aitziber San Román, Gizarte Ekintzako zinegotzia./Donostiako Udala
Aitziber San Román, Gizarte Ekintzako zinegotzia. / Donostiako Udala

Gizarte Zerbitzuek 14.883 familiari eman zieten laguntza iaz, aurreko ekitaldian baino 283 familia gehiagori

EL DIARIO VASCO

Gizarte Ekintzako zinegotzi Aitziber San Románek departamentuaren 2018ko memoria aurkeztu du. Departamendu horrek 2018an 28.567.238 euroko aurrekontu bat kudeatu zuen, 2017an baino 2.139.238 € gehiago —% 8 gehiago—. Horren harira, honako hau azpimarratu du San Románek: «Gizarte Ekintzako aurrekontua handitu egin da urtero legegintzaldi honetan; zehazki, % 15 handitu da 2015etik. Egoera ekonomikoa ere hobetu da, eta, horregatik, zenbateko ekonomiko baxuagoak eskatu dituzte hiriko pertsonarik eta familiarik apalenek».

San Románek honakoa mugarri nagusi gisa azpimarratu du: «detekzio goiztiarreko programei esker, 1.000 adingabe baino gehiagori goiz egin ahal izan genien arreta. Esku-hartze goiztiarrez gain, babesgabetasun diagnostiko arin edo moderatuko adingabeen 579 kasutan egin genuen lan, baita babesgabetasun larriko beste 103 kasutan ere. Guztira, 1.687 adingaberi egin genien arreta».

Zentzu horretan, San Románek gogorarazi du 2018an erabat berriztatu zela Egiatarra Erretiratuen Elkartea. Horri esker, alde batetik, «hiriko gainontzeko 22 elkarteek bezalaxe, Donostiako adinekoek hiriko bizitza sozialean parte hartzen jarraitzea ahalbidetzearen aldeko lan izugarria egiten duen» erakunde baten instalazioak berriztatu ahal izan dira, eta, bestetik, posible izan da Gros auzoan hiriko laugarren Goizaldia irekitzea.

Bestalde, zinegotziak honakoa ere azpimarratu du: «iaz, bi mugarriren bitartez aurrerapausoak eman genituen Gizarte Zerbitzuak herritarrei hurbiltzeko: birkokatu egin zen Atotxan Gros eta Egia auzoetako 37.059 donostiar artatzen dituen Gizarte Zerbitzuko Zentroa eta martxan jarri zen lineako hitzordu-zerbitzua». Atotxako Gizarte Zerbitzuen Zentroa —legegintzaldi honetan inauguratzen den hirugarrenak— 454 m2 ditu, eta 231.369 euro inbertitu dira bertan.