Behera egin dute Euskadin dibortzio- eta banantze-tasek

Behera egin dute Euskadin dibortzio- eta banantze-tasek

Botere Judizialaren Kontseilu Nagusiak jasotako datuen arabera, EAEko auzitegietan 1.178 disoluzio eskaera jaso dituzte urtarrila eta martxoa bitartean. Iaz, aldiz, 1.142 izan ziren

DVDonostia

Ezkondutako bikoteen banatze kopuruak gora egin du aurten, aurreko urtearekin alderatuta. Hala ere, banatze-tasa baxuena duen bigarren Autonomia Erkidegoa da Estatuan Euskadi, Gaztela Leonen ondotik.

Zehazki, %3,1 egin dute gora matrimonio disoluzioek Gipuzkoa, Bizkaia eta Araban, 2018ko lehen hiruhilekoarekin alderatuta datuak, betiere, eta banantze zein dibortzioak kontuan hartuta. Botere Judizialaren Kontseilu Nagusiak jasotako datuen arabera, EAEko auzitegietan 1.178 disoluzio eskaera jaso dituzte urtarrila eta martxoa bitartean. Iaz, aldiz, 1.142 izan ziren.

Banatze eskaera horien kopurua biztanleenarekin alderatuta, kalkulatu dute 10.000 herritarren artetik 5,3k egin dutela halako eskakizunik, eta Gaztela Leonen 4,9 izan direla. Estatu mailan, batez beste, 6,2 egin dituzte. Banantze eskakizun gehien egindako autonomia erkidegoen artean daude, bestalde, Aragoi, Kanariar uharteak eta Valentzia, batez besteko 6,9ko tasarekin.

Euskadin adostasunezko 765 dibortzio erregistratu dira, guztira, hiruhileko honetan. Iaz baino %3,9 gehiago dira, eta gora egin dute, baita ere, auzi-prozesuzko dibortzioek. Guztira, 378 izan dira, %3,3 gehiago.

Banantzeei dagokienez, adostasunezko 24 izan dira guztira, iaz baino gehiago, eta auzi-prozesuzkoak, bestalde, 11, iaz baino gutxiago. Ezkontzaren deuzeztasunik ez da izan, halaber, iaz bakarra eman zen bitartean. Estatu mailan, orokorrean, gora egin dute dibortzio eta banantzeek, ezkontza-deuzeztatzeek behera egin badute ere.

Temas

Euskera