Javier Bilbao EHUko irakaslea saritu dute bere ibilbide zientifikoagatik

Javier Bilbao saria jasotzen /EHU
Javier Bilbao saria jasotzen / EHU

Ingeniaritza kimikoko katedraduna prozesu katalitikoen eta hondakinen balioztatzerako ikerketa taldeko koordinatzailea da, eta 130 ikerketa proiektu baino gehiagotan parte hartu du

DVDonostia

Javier Bilbao Elorriaga Euskal Herriko Unibertsitateko (EHU) Zientzia eta Teknologia Fakultateko irakaslea saritu du Espainiako Kimikarien eta Ingeniari Kimikoen Elkarte Nazionalak, Espainiako Industria Kimikoaren Enpresa Federazioarekin (FEIQUE) eta Expoquimia Kimikaren Nazioarteko Topaketarekin elkarlanean. ICCE 2019 sarien lehen edizioa igande honetan egin dute Santanderren, eta EHUko irakasle eta ikertzailea aintzatetsia izan da Bikaintasuna I+G+Ban sariarekin, Erreakzio Kimikoaren Ingeniaritzaren alorrean egin dituen «ekarpen bikainengatik» eta izan duen ibilbide zientifikoa aitortzeko.

«Sari hau goraipamena da, bai nire lanari, bai koordinatzen dudan taldeari (Prozesu katalitikoak eta hondakinen balioztatzea). Biofinketaren eta hondakinen finketaren garapenean taldeak lortutako emaitzek duten eragina eta nazioarteko oihartzuna nabarmentzen ditu. Izan ere, lan horrek prozesu termiko eta katalitiko berritzaileak proposatzen ditu, erregaiak, hidrogenoa eta lehengaiak eskuratzeko iturri berriztagarrietatik; adibidez, biomasa, plastikoa, pneumatikoa eta karbono dioxidoa», azaldu du sarituak.

Bilbao (Galdakao, 1951) Ingeniaritza Kimikoko katedraduna da EHUn. Prozesu katalitikoak eta hondakinen balioztatzea (PROCAT-VARES) ikerketa taldeko koordinatzailea da, eta 130 ikerketa proiektu baino gehiagotan parte hartu du.

Aldizkari zientifiko indexatuetan 480 artikulu argitaratu ditu, eta 14.000 aipamen baino gehiago dauzka. Doktorego tesiak gidatu ditu, 37 guztira, eta 80 lizentziatura tesi; gradu amaierako lan eta master amaierako lanak ere bideratu ditu, zazpi patenterekin. 2006an Ingeniaritza Kimikoaren Sari Nazionala jaso zuen (Kimikako Espainiako Errege Sozietatea).

ICCE 2019 sarien helburua da jarduera profesionalaren garapenean bikaintasuna aitortzea, sustatzea eta bultzatzea, bai akademian bai industrian. Javier Bilbaorekin batera, CEPSA eta Inmaculada Ortiz Uribe ere saritu dituzte, Enpresa eta Berrikuntza kategorian eta Transferentzia kategorian, hurrenez hurren.

Temas

Euskera