Itsasertzeko hiriak klima aldaketara nola egokitzen diren ikergai

Donostiako La Perla eraikina, urez inguratuta, 2016ko otsailean./ARIZMENDI
Donostiako La Perla eraikina, urez inguratuta, 2016ko otsailean. / ARIZMENDI

Mehatxu horri aurre egiteko ezarritako politikak ebaluatuko dituen ikerketa BC3ko ikertzaile Marta Olazabalek zuzenduko du

Itsasertzeko hiriek bereziki pairatzen dute klima aldaketari leporatzen zaizkion itsas mailaren igoerari eta muturreko gertakari klimatikoei lotutako mehatxua. Arazoari aurre egiteko, eta kontuan izanik munduko hiri jendetsuenen artean asko itsasertzean daudela, «1997az geroztik, hamaika neurri ari dira aplikatzen, era guztietakoak, nazioarteko konpromiso eta hitzarmenen ondorioz (adibidez, 2015eko Pariseko Akordioak)», BC3 (Basque Centre for Climate Change) Klima Aldaketa Ikerketa Zentroa ohar baten bidez zabaldu duenez. Hala ere, dio oharrak, «komunitate zientifikoak eta arduradun politikoek ez dute behar adina informazio ebaluatzeko zer inpaktu duten mundu mailan egokitzapen-politika horiek».

Bada, izen bereko aseguru-etxearen menpeko AXA Fundazioak, zeinak batik bat aurrerapen soziala xede duen ikerketa zientifikoa sustatzen duen, ikerketa proiektu bat abiarazi du, klima aldaketara egokitzeko politika publikoek eta hirietan xede horretarako egiten ari diren inbertsioek zenbaterainoko kalitatea eta eraginkortasuna duten ebaluatuatzeko. Eta proiektua, nazioarteko lehia-prozesua irabazi ondoren, BC3ko ikertzaile senior Marta Olazabalek zuzenduko du.

Ikerketa-proiektuak bi urte iraungo du, eta 130.000 euro jasoko ditu. Ikertzailearen arabera, «egiazko informazioa emango dugu orain arte egin diren inbertsioen emaitzei buruz, leku bakoitzeko arrisku-profilera egokitutako egokitzapen-politikak bideratzen laguntzeko». BC3ko ikertzaileak azpimarratzen du zeinen garrantzitsua den informazio nahikoa eta egokia edukitzea egiten diren ahaleginak ebaluatzeko; izan ere, «etengabeko aurrerapen zientifikoei esker, klima-eredu hobeak ditugu, eta horrek eraginkorrago egiten ditu egokitzapen-politikak. Funtsezkoa da politika horiek ebolutiboak izatea eta maiz berrikustea», nabarmendu du.

Proiektuak aukera emango du alderatzeko klimari lotutako berariazko arriskuei buruz dauden datuak (kostako 120 hiritan dauden klima-arriskuei buruz BC3k garatu duen datu-basearen bidez) eta milioi bat biztanle baino gehiagoko hiri horietan egin diren egokitzapen-politika publikoei eta inbertsioei buruz bildu beharreko datuak. Proiektuari esker, tokiko gobernuek lege-mailan egiten dituzten ahaleginak arrisku-eredu zientifiko horiekin lotu daitezke, eta, horrenbestez, erreferentzia-esparru bat eskain daiteke, hala hobeto ulertzen baitira arriskua murrizteko aukerak (noiz eta nola) eta hirietan egiten diren esku-hartzeak hiriok gaitasun handiagoa izan dezaten klima-aldaketara egokitzeko.

Temas

Euskera

Contenido Patrocinado

Fotos

Vídeos