Bozka

Karlos Linazasoro./Luis Michelena / DV
Karlos Linazasoro. / Luis Michelena / DV

'Denak dituk pobreen aldekoak'

Karlos Linazasoro
KARLOS LINAZASORO

Schopen etorri zait Altzetara artalde eta guzti. Urduri sumatu dut, urduri dago. Bihar da eguna, bihar bozkatzera joanen da. «Biok elkarrekin joango gaituk, Schopen, ez larritu horregatik». Ea zerbait erabaki dudan, hark. «Hori hire artaldean zenbatsu ardi dauzkaan esatea bezalakoa duk: sekretu handia!». Barre ttiki bat piztu da artzainaren ezpainetan. «Baina, guttigorabeherakoren bat, Karlos... hori pentsatua izango duk». «Hemen ez zagok guttigorabeherakorik, gizon. Bozka bat eman behar duk, oraingoan bi, eta kitto! Asmatzen baduk, ondo; bestela, potto!». «Lehenengo aldia duk, lagun, inoiz ez diat bozkarik eman, mendian-eta, badakik... Eta ez zauzkat gauzak batere argi». «Ba, gustukoen duanari eman beharko diok, edo txarrenen artean, onenari». «Txarrenen artean onenari, diok? Bi debate famatu edo dena delako haiek ikusi nitian, eta zer ikusi nian ba? Iraina eta kaka besterik ez! Bat bazegoan hobexeagoa, edukazio handixeagoa zuena...». «Baina euskaldunak ere aurkezten dituk, Schopen. Guk haiei eman behar zieagu botoa, gainerakoan jai diagu euskaldunok Madrilen. Abertzaleak eta konstituzionalistak zaudek, eskuinekoak zein ezkerrekoak, komunistak, marxistak, liberalak, demokrata-giristinoak, humanistak, fatxorro xamarrak, sozialistak, independentistak... nahi adinako aukera daukak». «Eta ekologistak?». «Denak dituk ekologistak». «Eta pobreen aldekoak?». «Denak dituk pobreen aldekoak». «Eta zezenketen kontrakoak?». «Denak dituk zezenketen kontrakoak». «Eta pentsioak igotzearen aldekoak?». «Denak ditu pentsioak igotzearen aldekoak». «Eta... eta herri santu honetan elkar konpontzearen aldekoak? Bizikidetza eraikitzearen aldekoak?». «Oi, horretan ere denak dituk... baina ez horrenbeste». «Eta hiri zer iruditzen zaik independentzia, Karlos? Nik ez diat kontua oso garbi ikusten...». «Bihar esango diat, txo. Orain hartzagun garagardotxo bana!».