Baxoa euskaraz egitea aldarrikatuko dute berriz astelehenean

'Brebeta euskaraz' irakur zitekeen maiatzean Baionan egin zen danborrada/manifestazio handian parte hartu zuten ikasle askoren elastikoetan. Baxoa, alegia, ez da arazo bakarra./SEASKA
'Brebeta euskaraz' irakur zitekeen maiatzean Baionan egin zen danborrada/manifestazio handian parte hartu zuten ikasle askoren elastikoetan. Baxoa, alegia, ez da arazo bakarra. / SEASKA

Eguerdirako Baionan deitu den elgarretaratzean, Iparraldeko ikastolak kexu dituen irakasle faltak ere izango du presentzia

Astelehenean, ekainaren 18an, hasiko dira Ipar Euskal Herrian Baxoaren azterketa idatziak. Frantziako estatuan, hain zuzen, azterketa bidez Baccalauréat delako agiria lortzeak bermatzen du bigarren mailako ikasketen amaiera, eta berorrek irekitzen du unibertsitaterako bidea.

Iparraldean badira bigarren mailako ikasketak euskaraz burutzen dituzten ikasleak, kasurik gehienetan ume-umetan hasitako euskarazko ibilbide akademikoa Seaskaren Bernat Etxepare Lizeoan amaitzen dutenak. Horrenbestez, urteak daramatzate azterketa garrantzitsu hori euskaraz egiteko eskubidea aldarrikatuz, eta legeak horretarako aukera eskaintzen duela gogoratuz.

Baina, Seaskak dioenez, aurten ere «Ipar Euskal Herriko ikasleei azterketak euskaraz pasatzea debekatuko zaie, historia-geografia eta matematiketaz haratago». Haien ustez, «baxoa euskaraz egiteko aukera izatea, euskarari zor zaion ezagutza ematea litzateke, eta eskolatze guzia euskaraz egin duten ikasleen ibilbidearen ezagutza ere».

Hezkunde Ministerioak ere onartzen du hori, teorian, urteak baitira «Euskararen Erakunde Publikoaren bidez azterketak euskaraz egiteko urratsak hitzeman dituela». Hala ere, nahiz eta «Hezkuntza kodeak argiki baimendu azterketak lurralde hizkuntzetan egiteko aukera», orain arte «ez dute inolako borondaterik ageri egoera aldatzeko».

Hori salatzeko, Seaskak, Etxepare Lizeoak eta Baxoa Euskaraz! ikasle kolektiboak elgarretaratze batetara deitu dute datorren astelehenean, ekainak 18, Baionako Cassin azterketa zentroaren aurrean, 12:00tan.

Elgarretaratze horretan, azken hilabeteetan Iparraldeko ikastolen inguruko komunitatea kexu eta haserre daukan beste arazo batek ere izango du presentzia. Aurreratu dutenez, «heldu den sartzerako oraindik eskas ditugun irakasle postuak ere izanen ditugu aipagai». Gogoratu behar da maiatzen hasieraz geroztik -orduan egin zen Baionan 7.000 lagun biltzera iritsi zen manifestazio handia- etengabe ari direla mobilizatzen Ipar Euskal Herriko ikastoletako langile, ikasle eta gurasoak irakasle gehiagoren eskean.

Ikasturte berrirako aurreikunsten den ikasleen aldetiko igoeraren ondorioz 25 irakasle gehiago behar dituela dio Seaskak, eta Hezkunde Ministerioran proposamena oso-oso urrutik gelditzen da kopuru horretatik. Seaskak aurreratu duenez, «Hezkunde Ministeritzak Seaska eta Euskararen Erakunde Publikoarekin izenpetu hitzarmena errespetatzea galdeginez Herri Urratsen abiatu mozioak Ipar Euskal Herriko hautetsien gain ukan duen erantzunaren berri» emango dute asteleheneko elgarretaratzean.

Temas

Euskera
 

Fotos

Vídeos