Atzerriko euskal herritar gehienak Argentinan bizi dira eta euskal lurraldean jaiotakoak dira

Euskal etxeen aurtengo nazioarteko kongresuan izan da lehendakaria/EFE
Euskal etxeen aurtengo nazioarteko kongresuan izan da lehendakaria / EFE

Ikerketa burutu du Eusko Jaurlaritzak Euskal lurraldetik kanpo bizi diren euskal herritarren jarrera eta iritziak ezagutu ahal izateko

DVDonostia

Euskal lurraldetik kanpo bizi diren euskal herritarren jarrera eta iritziak ezagutzeko asmoz, ikerketa burutu du Eusko Jaurlaritzak. Beren nortasunari, euskal kulturarekin duten loturari, Euskal Etxeekiko harremanari eta kanpoan den euskal komunitaterako Eusko Jaurlaritzaren programen ezagutza eta balorazioari buruz galdegin diete parte hartzaileei. Gehienak Argentinan bizi dira eta euskal lurraldean jaiotakoak dira.

Landa lana 2019ko ekainaren 7a eta abuztuaren 30a bitartean egin zen, galdetegi bat helaraziz Eusko Jaurlaritzaren Lehendakaritzako Kanpo Harremanetarako idazkaritzarekin lotura duten pertsonei eta kanpoko euskal herritarrek gehien erabiltzen dituzten informazio atari eta sare sozialetan galdetegia zabalduz.

Gehienak Argentinan bizi dira, eta %20 euskal lurraldean jaio ziren. Inkesta erantzun duten kanpoko euskal herritarren %20 Latinoamerikako beste herrialde batzuetan bizi da, %10 Europako herrialde desberdinetan, %9 Estatu Batuetan eta Kanadan, %5 Espainian eta %1 Euskal Herrian.

Inkestatuen %20 euskal lurraldean jaio ziren, %19 ez ziren euskal lurraldean jaio baina beren gurasoetako bat behintzat bai, %26ren kasuan euskal lurraldearekiko lotura aurreko belaunalditik dator, aitona-amonaren bat euskal lurraldean jaiotakoa zelako, eta kasuen %33an, lotura urrunagokoa da denboran, lehenagoko arbasoak direlako euskal lurraldean jaiotakoak.

Euskal lurraldean jaiotakoek, batez beste 31 urte daramate kanpoan. Gehienak 1980 eta 1999 artean eta 2000. urtetik hona joandakoak dira. Halaber, Euskal lurraldean jaiotakoen ia heren batek gaur egun bizi den herrialdean gelditzen asmoa du.

Euskal nortasun sentimendua

Elkarrizketatuen artean euskal nortasun sentimendua oso presente dagoela ondorioztatu dute. Inkestatuen %14k ondo dakite euskaraz; %15ek diote euskara izan zutela ama hizkuntza, bakarrik edo beste hizkuntza batekin batera.

Gehienek diote identitate bikoitza sentitzen dutela, euskal herritarra alde batetik eta bizi diren herrialdekoa bestetik. %3k bakarrik diote bizi diren herrialdekoak sentitzen direla soilik.

Inor euskal herritartzat hartzeko baldintza nagusiei buruz galdetuta, inkestatuek batez ere aipatzen dute euskal arbasoak izatea, euskal herritar sentitzea edo euskal herritar izan nahi izatea, euskaraz hitz egitea, euskal lurraldean jaiotzea eta euskal abizenak izatea.

Gehien interesatzen zaizkien euskaltasunaren alderdiak dira historia (%44k aipatu dute bi nagusien artean), tradizioak (%42) euskara (%40) eta gastronomia (%19).

Euskaltasunarekiko lotura mantentzeko modu nagusiak dira gehienbat harreman pertsonalak, Euskal Etxeetako ekintzetan parte hartzea eta albisteak. Pertsona horiek gehienek ohiko harremanak dituzte euskal lurraldean bizi direnekin edo kanpoan bizi diren euskal jatorriko beste batzuekin.

Ikerketaren lagina posta eta online bidezko 3.241 elkarrizketa autoadministratuz osatua dago. Informazio bilketa 2019ko ekainaren 7a eta abuztuaren 30a bitartean egin zen.

Temas

Euskera