Asoziazionismoa eta berdintasuna sustatzeko laguntzak argitaratu ditu Emakundek

Emakundek asoziazionismoa eta berdintasuna sustatzen duten proiektu estrategikoak indartzeko emakumeen elkarteei eta irabazi asmorik gabeko bestelako erakundeei bideratutako dirulaguntzen deialdia aurkeztu du. Ildo bakoitzak 215.000 euroko aurrekontu saila du eta eskariak egiteko epea maiatzaren 9an amaituko da.

Erabakia, bata asoziazionismoa indartzeko proiektuetarako, eta bestea emakumeen eta gizonen berdintasuna sustatzeko proiektu estrategikoetarako egitea, iazko edizioaren ebaluazioa egin ostean hartu zen. Beraz, noski, erakunde bakoitzak laguntza lerro bakoitzeko laguntza bakarra jaso ahal izango du, gehienez 8.000 eurokoa asoziazionismoa indartzeko, eta 20.000 eurokoa emakumeen eta gizonen berdintasuna sustatzeko proiektu estrategikoetarako.

Deialdiaren beste berrikuntzetako bat elkarteei zuzendutako aholkularitza zerbitzu bat abiatzea da, proiektuak egin eta aurkeztean sortzen diren ohiko zalantzak argitzeko.

Laguntzak eskatzeko hilabeteko epean, erakunde eskatzaileek laguntza integrala eskuratu ahal izango dute, proiektuen formulazioari, balorazio irizpideei edo diru laguntzaren izapidetze digitalari buruzko zalantzak argitzeko.

Hautaketa-batzorde bat osatuko da aurkeztutako eskabideak aztertu eta ebaluatzeko. Deialdi honetan ezarritako baldintzak betetzen direla egiaztatuko du eta, ondoren, esleipen-proposamen arrazoitua aurkeztuko dio Emakunde-Emakumearen Euskal Erakundeko zuzendariari, laguntzak emateko ebazpena eman dezan; gero, justifikazioari dagokion jarraipena egingo du.