Festa itzela antolatu dute Iruñean iganderako

Korrika Deban, goizean goiz. /
Korrika Deban, goizean goiz.

20. Korrikaren amaierako ekitaldi nagusia Foruen Enparantzan egingo da, 12:30etik aurrera

EL DIARIO VASCO

Gaua eta eguneko lehen orduak Gipuzkoan igaro ondoren, Bizkaian da asteazken goizaz geroztik 20. Korrika, ostegun arratsaldean Bilbora helduko delarik. Notizia, baina, Iruñeatik iritsi da, bertan aurkeztu baitute iganderako prestatuta daukaten festa itzela.

Hilaren 9ko bukaera-egun handia aurkezteko prentsa-agerraldia egin dute AEK eta Korrikaren arduradunek. Haiekin batera, Reyes Ilintxeta kazetaria izan da, bukaerako ekitaldi nagusiaren aurkezlea. Bukatu, Iruñeko Sarasate pasealekuan bukatuko da Korrikaren 20. edizioa, behin Nafarroako Parlamentuaren aurretik igarota.

Asier Amondok nabarmendu duen bezala, Iruñea da Korrikaren bukaera gehien hartu dituen hiriburua, AEKrentzat «sekulako pizgarria» delarik edizio hau ere bertan amaitzea, «Iruñean nahiz Nafarroan eman den aldaketa instituzionalak urte beltzen aroaren amaiera ekarri duelako». Hortaz, «une ezin hobean dator herri honek duen ekimen zirraragarrienaren 20. aldia».

Ekitaldi nagusia 12:30ean egingo da Foruen Monumentuaren ondoan. Bertan zabalduko da Euskal Herri osoan zehar 2.500 kilometro egin dituen lekukoa, eta irakurriko da Otxandion sartu zitzaion mezua.

Hiru gune

Une gorena hori izango bada ere, egun osoan izango da animazioa, eta Arantza Ilarregi azken eguneko arduradunak aurreratu du eguraldia lagun izatea espero dela. Festa hirira zabaltzeko, hiru gune prestatu dituzte. Aurrenekoa Labrit pilotalekuan egongo da, bertan herri bazkaria eta dantza saioak egingo direlarik. Haurrekin bertaratutako diren familiei zuzendutako gunea Alde Zaharreko Aduanaren Txoko inguruan jarriko dute, puzgarri, ludoteka, tonbola eta horrelakoz. Hirugarren festa-gunea, berriz, Antoniutti Parkeak hartuko du, bertan antolatu direlarik, eguerditik aurrera, musika saio nagusiak.

Horiez gain, beste espazio batzuk ere egokituko dituzte Alde Zaharrean. Joaldunak ariko dira udaletxe ondoan; Errigora azoka jarriko dute San Frantzisko plazan, eta eskulangintza feria San Nikolasen. Edizio honetan, gainera, etxetik eramandakoa jan nahi dutenek horretarako aukera izango dute Zaldiko Maldiko elkartean.

Asier Amondok igandeko festaren aurkezpena baliatu du aurreratzeko oso sentsazio onak uzten ari dela «ilusioaren Korrika». «Orain arte, aurrekoetan baino jende gehiago egon da toki guztietan, eta hori guretzat termometro garrantzitsua da. Giroaren arabera, uste dugu apirilaren 9an jende asko bilduko dela Iruñean», esan du.