ENE saria jaso du Erromako Euskara elkarteak

Eusko Ikaskuntzako lehendakari Iñaki Dorronsoro eta Associazione Culturale Euskara elkarteko Alexander Mendizabal./
Eusko Ikaskuntzako lehendakari Iñaki Dorronsoro eta Associazione Culturale Euskara elkarteko Alexander Mendizabal.

EI-ko lehendakari Iñaki Dorronsorik Iruñean egin den ekitaldian eman die saria Italian euskara eta euskal kultura sustatzen dituen elkarteko ordezkariei

DVdonostia

Iruñean eman dio astelehen honetan Eusko Ikaskuntzak ENE Saria Associazione Culturale Euskara elkarteari, 2015ean Italian barrena euskal kultura hedatzen egindako lana aitortzeko. Nestor Basterretxea artistak diseinatuako anagrama eskultorikoaren erreprodukzioa Alexander Mendizabalek eta Roberta Gozzik, italiako elkartearen bazkideak, jaso dute Iñaki Dorronsororen, Eusko Ikaskuntzaren Lehendakariaren, eskuetatik.

Civivox Condestablen egindako ekitaldian Dorronsorok nabarmendu du elkarte sarituak euskara eta euskal kultura Italiako bazter askotara eramateko daukan indarra. Azken urteetan burutu dituen ekimen zehatzak ere goraipatu ditu. Associazione Culturale Euskara-ko kideek, berriz, saria «oso une egokian» heldu zaiela esan dute, eta aurrera egiteko indarra ematen diela ere bai. Boluntarioek egiten duten lan ere goraipatu dute elkarteko ordezkariek.

2002an sortutako elkarte erromatarrak euskal kultura eta hizkuntzaren zabalkuntza ditu helburu, Italiako beste hainbat kulturarekin elkarrizketa elkarlanean. Hiru urtez euskarazko ikastaroak eman eta gero, Euskal Hizkuntza eta Kultura Saila sortu zen 2005ean, Erromako Herri Unibertsitatean (UPTER). Elkartea eta Saila 'Euskanta' proiektua sustatzen ari dira 2010az geroztik, HABEren Euskara Munduan programaren babesarekin. Erromako eskoletako haurrek poesiak idazten dituzte eta horiekin euskarazko kantak konposatzen dira. Konposaketa guztiak www.euskanta.wordpress.com webgunean aurki daitezke.

Horrez gain, Associazione Culturale Euskarak bilera-aperitiboak antolatzen ditu hilean behin eta Erromako kultur bizitzari bizigarria ematen dio, kontzertu, irakurketa, aurkezpen, erakusketa, workshop eta dastaketekin. 2013ko abenduan Euskal Aste bat antolatu zuen Erroman.