Amesten al dute androideek ardi latx elektrikoekin?

Amesten al dute androideek ardi latx elektrikoekin?

Robotikari erreparatuko dio nagusiki azaroaren 12an Donostian egingo den Informatikari Euskaldunen X. Bilkurak

N.A.donostia

Hamargarren urteurrena dela eta, ukitu berezia eman nahi izan dio Udako Euskal Unibertsitateak Informatikari Euskaldunen Bilkurari. Informatikaren beste alor batzuk alboratu gabe, robotika izango da azaroaren 12an Donostiako Miramon Teknologia Parkean egingo den jardunaldiaren gai nagusia eta, hori girotzeko Philip K. Dicken 'Do Androids Dream of Electric Sheep?' eleberri laburraren izenburua berrasmatu dute, 'Amesten al dute androideek ardi latx elektrikoekin?' esaldia bilakatuz jardunaldiaren lelo. UEUren web gunean eros daitezkeen kamiseta dotore askoak ere atera dituzte bilkurarako.

Horiek soinean zituztela aurkeztu dute Jardunaldia Iñaki Alegria UEUko zuzendariak, Edurne Larraza bilkuraren koordinatzaileak eta antolatzaile taldeko Olatz Perez de Viñasprek. Esteka horretantxe eman daiteke izena. Matrikula doakoa da, baina ezinbestekoa da izena ematea. Parte-hartzaile kopuruari dagokionez baikorrak dira antolatzaileak -eragile nagusia UEU bada ere, Enpresa Digitala eta Spri taldea ditu lagun, eta Eusko Jaurlaritzaren, Foru Aldundiaren eta Donostiako Udalaren laguntza dute-, iaz 200 lagunetik gora bildu baitziren Miramonen.

Iazko datua ez zen salbuespena izan, 1996an aurreneko edizioa antolatu zenez geroztik batez besteko parte-hartzaile kopurua 125 lagunekoa izan baita. Edurne Larrazak nabarmendu duenez, «informatikarekin lotura duten hainbat arlotatik etorriak dira parte-hartzaileak: irakaskuntza, industria, administrazioa eta komunikabideak nagusiki».

Iñaki Alegriak esan du, UEUren izenean, Informatika Jardunaldiak bete-betean egiten duela bat Udako Euskal Unibertsitatearen hiru helburu nagusiekin.: «Lehena, goi-mailako kalitatezko euskarazko formazioa eskaintzea ; bigarrena, eskaintza hori gure tokian tokiko gizarteak dituen beharrei uztartzea; eta hirugarrena, ezagutza hori partitzeko foroak eskaintzea». Informatikarien kasuan, «nahiz eta gero eta gehiago izan, oraindik ez daude gune asko arlo akademiko konkretu batean elkarlanean aritzeko, are gutxiago esparru horretan euskaraz aritzen direnentzat. Hutsune eta behar horretaz jabetuta, UEUko Informatika sailak duela ia bi hamarkada baino gehiago antolatu zuen lehendabiziko aldiz topaketa hau, profesional eta zaletu euskaldunek esparru bakoitzean sortzen diren kezka, iritzi eta gai desberdinak komunean jar zitzaten. Gaur aurkezten duguna hamargarren edizioa da, eta zalantzarik gabe esan dezakegu arloko erreferentea bihurtu dela denbora honetan».

Jardunaldiek etorkizuna iragartzeko gaitasuna izan dutela ere ekarri du gogora Alegriak, aurreko bederatzu edizioetako gaiak errepasatuta ikusten baita zetozen berrikuntzetan jarri izan dutela beti fokoa. Oraingo honetan, alor askotan gero eta presentzia handiagoa duten robotetan eta adimen artifizialean jarri dute arreta, eta gaia hiru ikuspegitatik landuko da goizeko hitzaldietan: robotika ikerkuntzan; robotika enpresan eta robotika medikuntzan. Baina robotek, Edurne Larrazak esan duenez, «mekanikaz eta elektronikaz gain, softwarea behar dute. Gaur egun internet bidez eta gizarte-sareak erabilita robotekin komunikatzeko aukera dago. Teknologia berriak, gaurkoak, atzokoak eta biharkoak, aurreratuenak, barneratzen dituzte. Gizartean onarturik daude, etxeko tresna gisa, irakaskuntzan eta medikuntzan ere erabiltzen dira. Aurreko edizioetako izenburuak ikusita orain arteko gai guztiak bildu ditugu robotikaren inguruan. Informatikari euskaldunen bilkura izanik, robotikaren munduaz ez ezik, informatikan euskaraz jarduteak berezko dituen bestelako gorabeherek ere izango dute lekua bilkurako gaien artean. Beraz, eta ohi bezala, izandako esperientzien eta garatutako softwarearen berri ematea litzateke gure asmoa».

Horretarako, bi komunikazio saio paralelo egingo dira, eta bakoitzean sei egitasmo edota esperientzia konkretu aurkeztuko dira, alor oso desberdinetakoak. Jardunaldia bukatzeko, mahai ingurua antolatu dute lehen eta bigarren hezkuntzako informatikaren irakaskuntzaz.

 

Fotos

Vídeos