Donostiako Oporretan Euskaraz udalekuetan izena emateko azken egunak

Askotariko jarduerak egiten dituzte haurrek/J. M. Lopez
Askotariko jarduerak egiten dituzte haurrek / J. M. Lopez

Ostiralean, hilak 10, bukatuko da udaleku irekietan izen-emateko epea. Udalekuak uztailean zehar egiten dira, astelehenetik ostiralera

El Diario Vasco
EL DIARIO VASCODonostia

Donostiako udaleku irekietan 2008tik 2014ra bitartean jaiotako haur donostiarrek har dezakete parte. Interesa dutenek maiatzaren 10aren aurretik eman behar dute izena interneten edo Euskara Zerbitzuaren bulegoan.

Udalak jakinarazi duenez, gehienez ere 12 haurrez osatutako taldeak izaten dira Oporretan Euskaraz udaleku irekietan, eta hizkuntza ereduaren, jaiotze urtearen eta jasotze puntuaren arabera eratzen dira.

Plazak zozketa publiko bidez eskainiko dira, 76 talde osatu bitartean. Zozketa maiatzaren 15ean egingo da eta emaitzak egun berean kontsultatu ahal izango dira, arratsaldez, www.donostiaeuskaraz.eus eta www.donostia.eus webguneetan.

Udalekuak uztailean zehar egiten dira, astelehenetik ostiralera, 09:30etik 13:30era. Astean behin egun osoko irteera izaten dute haurrek, 09:30etik 17:00etara, haur hezkuntzakoek izan ezik.

Askotariko jarduerak egiten dituzte: hondartzara joaten dira, hiriko parke eta lorategietan jolasak egiten dituzte, euria egiten duenean eskola edo haur txokoetako gelak erabiltzen dituzte jolas, lantegi eta txapelketak egiteko, eta ingurumena lantzen dute. Gainera, udan Donostian izaten diren beste hainbat ekimenetan parte hartzen dute: Jazzaldia, Pilota Eskola, San Telmo Museoa. Aurten uztailaren 1etik 30era bitartean izango dira.

Hilabete osoko kuota arrunta 164,06 eurokoa da; familia ugariek eta guraso bakarrekoek %75 ordainduko dute (123,04 euro), familia ugari bereziek %50 (82,03 euro) eta gizarte laguntza jasotzen dutenek %10 (16,40 euro). Prezioan sartuta daude garraioa eta materiala.

Donostiako Udaleko Euskara Zerbitzuak 25 urtetik gora daramatza udaleku hauek antolatzen. Euskararen normalizazioan eragiteko «tresna oso baliagarria» dela deritzo, «euskara lantzeko eta erabiltzeko helburua ondo betetzen dutelako, Donostiak eskaintzen dituen jolas eta aisiarako aukerak baliatuz».

Temas

Euskera