Arduraz kontsumitzeko aukerak ezagutzeko parada

Larunbat honetan, Saretuz Sareak Donostian kontsumo arduratsua sustatzen duten iniziatiba, denda eta eragileak bilduko ditu Loiola kalean, 10:00etatik 14:00etara. Han izango dira Gabiltza Gipuzkoako Artisau Biltzarra, Mugarik Gabe, Grupo Emaus Fundación Social, Economistas Sin Fronteras-EsF Euskadi Mugarik gabeko Ekonomilariak, Cristina Enea Fundazioa, Ximaurpila, Calcuta Ondoan ONGD, GoiEner, AntiguaOtarrak kontsumo taldea, Setem Hego Haizea, Git Gipuzkoa Fiare Banca Ética, Guardetxe, Truke eta VSF Justicia Alimentaria Global.

Horrez gain, 'Ezagutu Donostiako kontsumo arduratsuaren bizilagunak' ekimenaren baitan, iniziatiba horiek guztiak bilduko dituen webgunea eta aplikazioa aurkeztuko dute.

Hori ez da, ordea, egunotan Donostian egingo den kontsumo arduratsuari buruzko ekitaldi bakarra. Hain zuzen ere, gaiari ikuspegi zehatz batetik, indarkeriaren matxistaren ikuspegigik, helduko diote gaur bertan, arratsaldeko 18:30etik aurrera, Guardetxean egingo den tailer batean. 'Indarkeria kontsumitzen al dugu? tailer parte-hartzailea Setem Hego Haizearen eskutik egingo da.