Amara auzoa Wikipediara eraman nahi dute

Mentxu Gal lorategietan burutuko da jarduera maiatzaren 30ean. /
Mentxu Gal lorategietan burutuko da jarduera maiatzaren 30ean.

'Amarapedia' egitasmoa hilaren 30ean gauzatuko da, Olatu Talka! egitasmoaren baitan. Aurretik prestakuntza saioak eskainiko dituzte Wikipedian editatzen ikasteko

M.I.donostia

Donostiako Amara auzoak aurpegi desberdin asko ditu. Hamarkada askoren buruan joan da osatzen eta garai bakoitzak eman dio bere ukitua, hasi berezko nortasuna duen Amara Zaharrean eta amaitu Osinaga inguruko zonalde berrienetan. Hori guztia bildu eta 'wikitu' nahi dute orain; Wikipedia interneteko entziklopediara eraman, hain zuzen ere.

Eragile asko daude ekimenaren atzean. Besteak beste Ernest Lluch Kultur Etxeko Liburutegia, Euskarazko Wikipedia komunitateko Wikilariak, Amarako auzotar eta elkarteak eta Olatu Talka jaiakdia. Hain zuzen ere, hilaren 29, 30 eta 31an egingo den jaialdi horren baitan gauzatuko da edizio maratoia Mentxu Gal lorategiak -Araba parkearen parean- kokatuko den karpa handi batean. Amarapedia ekimena, zehazki, hilaren 30ean burutuko da, larunbatez. Egun horretarako egokitutako karpan hainbat ordenagailu, liburu eta baliabide jarriko dira herritarren eskura informazioa jaso eta Wikipedian sar dezaten. Egitasmoa, haatik, ez da horretan agortuko, asmo handikoa baita. Esteka honetan ikus daitekeenez, gai desberdin askori buruzko artikuluak osatu nahi dira, eta hori ez da saio bakar batean lortzen.

Prestakuntza saioak

Donostiako zenbait kultura eragile eta wikilariren eskutik abiarazitako ekimenaren xede nabarmenena auzoari buruzko informazioa handitzea bada ere (dagoena zabaltzea eta berria lortzea, alegia), bestelako helbururik ere badu proiektuak, hala nola euskal Wikipedia indartzea, kalea hiritarrentzat berreskuratzea eta Donostiarentzat guztiz berezia izango den 2016 urtean hedapen zabalagoa izan dezakeen zerbaiten oinarriak jartzea. Hain zuzen ere, Amarakoa aurrekeko saioa izanik, Donostiako beste auzo batzuetara ere hedatu liteke ekimena.

Horretarako, baina, esku askoren partaidetza behar da, eta Wikipedian editatzea oso konplikatua ez bada ere hobe gaia kontrolatzen dutenengandik ikastea. Horretarako, ekimenean parte hartu nahi dutenei doako bi ikastaro eskainiko zaizkie, maiatzaren 26an eta 28an. Lau ordukoak izango dira ikastaroak, bi ordutegi daudela aukeran: 17:00etatik 19:00etara eta 17:00etatik 21:00etara. Ikastaroa Ernest Lluch Kultur Etxean egingo da, eta interesatuta dagoenak aurretik eman behar du izena kultur etxean bertan, 943 48 19 19 telefono zenbakira deituta edo amarakulturetxea@donostia.org helbidera idatzita (izen-abizenak, telefonoa, e-posta helbidea eta zein ordutegi komeni zaion adierazi behar du).

Contenido Patrocinado

Fotos

Vídeos