Hartu zakua lepoan eta hasi korrika

Orain dela lau urteko lasterketan egindako argazkia. Parte hartu ahal izateko ezinbestekoak dira kamiseta zuria eta galtza luze urdinak./TELLETXEA
Orain dela lau urteko lasterketan egindako argazkia. Parte hartu ahal izateko ezinbestekoak dira kamiseta zuria eta galtza luze urdinak. / TELLETXEA

Datorren igandean jokatuko da Saran Kontrabandisten Lasterketaren 55. edizioa. Horren harira hainbat ekitaldi antolatu dituzte herrian

Datorren igandean, abuztuak 26, Saran izango den Kontrabandisten Lasterketa iragartzeko egin duten kartelean atzetik segika gendarme bat eta guardia zibil bat daramatzan gizonezko bat ikusten da, buruan txapela, eskuan makila eta lepoan zakua. Aurten 55. ediziora heldu den lasterketa antolatzen dutenek, baita parte hartuko dutenek ere, aurretik doana dute gogoan: kontrabandista.

Kontrabandoa jarduera oso hedatua zen Xareta eskualdea osatzen duten Urdazubi, Zugarramurdi, Sara eta Ainhoan. Hain zuzen ere, beteranoena Sarakoa izanik, Urdazubin ere badute kontrabandisten lasterketa.

Sarakoa erronka da kirolaren aldetik. 8,4 kilometroko lasterketa da, igande arratsaldean, 18:00etan, Sarako plazatik irtengo dena, eta desnibel bikainak dituena. Lasterketa hasten eta bukatzen den Sarako plaza itsas mailatik 77 metrora dago, eta ibilbidearen erdi aldera aurkitzen dute korrikalariek punturik altuena, 522 metrora dagoen Zazpi Fago. Behin gailurra jota, dena da jaitsiera, baina hara iristeko aurkituko dituzte, irten eta ia segituan, %38ko desnibela duten eskailerak. Lasterketako zatirik gogorrena tontorrera iristeko kilometro baten faltan dagoen zatia da: 100 metro luze baino ez da, baina %51eko desnibela du.

Lasterketaren zailtasunari erantsi behar zaio antigoaleko eran (kamiseta zuriz eta galtza urdinez) jantzita joan behar duten korrikalariek hasieran eta amaieran lepoan eraman behar duten zaku modukoa. Gehienez ere 36 parte-hartzaile onartzen dira, 18 herri desberdinetakoak. Iaz Arantzako Dani Iparragirrek irabazi zuen lasterketa, 42 minutu eta 25 segundorekin. Errekorrari, ordea, 2006an lasterketa 38.36ko denboran burutu zuen Fernando Etxegaraik eusten dio. Eta igandean berriro saiatuko da Sarako lasterketa bereziena irabazten.

Festa giroa ere pizten du lasterketak herrian, eta egun aparta izan daiteke Lapurdiko udalerri ederrera gerturatzeko. Beti merezi du bisita Sarak, baina aparteko giroa izango da igandean, egun osoko egitaraua prestatu baitute.

Eguna hasteko, 10:00etan, sortzaileen merkatua egingo da plazan, eta haurrentzako jarduerarik ere izango dira. Besteak beste, pottoka gainean ibiltzeko aukera izango dute plazan bertan. Musika eta dantza ez dira faltako, ezta jateko eta edatekorik ere.

Lasterketaren aurretik, herri kirol erakustaldia izango da 16:00etan, eta Kontabandista Ttiki haurrentzako lasterketa 17:00etan. Bi multzotan egingo dute korrika plaza inguruan, 2007a baino lehen jaioak batetik, eta 2007-2012 artekoak bestetik. Helduek bezala, haurrek ere kamiseta zuria eta galtza urdin luzeak jantzi beharko dituzte lasterketan parte hartu ahal izateko.

Temas

Euskera

Contenido Patrocinado

Fotos

Vídeos