Angelus kontzertua ostiralean Arantzazun, Hots Abesbatzaren eskutik

Entseguetako argazki bat, Horts Abesbatzak berak zabadua./
Entseguetako argazki bat, Horts Abesbatzak berak zabadua.

Aurten ere eutsiko dio taldeak usadio bihurtu den hitzorduari, eta sorpresaz beteriko emanaldia eskainiko du 19:00etan

Dagoeneko Gabon garaiko usadio bilakatu den Angelus kontzertua eskainiko du Ahots abesbatzak ostiralean, urtarrilak 4, arratsaldeko 19:00etan, Arantzazuko santutegian. Ia 40 gizon eta emakumek osatzen dute abesbatza, gehienak Oñatikoak eta inguruko herrietakoak, eta 2016ko irailean Aitor Biain Bidarte zuzendariarekin ibilbidea hasi zuenetik, «piskanaka abesbatzen munduan tokia hartzen ari da», beraiek diotenez.

Ostiraleko kontzertuari dagokionez, lehenengo zatian, a cappella zein pianoz lagundurik, hainbat autore entzutetsuren lanak aurkeztuko dituzte, hala nola, J. Busto, K. Sato, E. Ugalde, F. Ibáñez, D. Andreo, J. Elberdin, P. Casals eta O. Gjeilo-renak.

Bigarren zatian, berriz, Giovanni Battista Pergolesiren 'Stabat mater' obra ezaguna interpretatuko dute. Hots Abesbatzaz gain, bakarlariak eta ganbera-oskestra ere arituko dira. Kontzertuaren berri emateko zabaldu duten oharrean diotenez, «12 zenbaki edo mugimenduz osaturiko obra hau, Pergolesiren lan erlijioso ospetsuena da. 1736an konposaturiko pieza hau jatorriz, soprano eta alto bakarlarientzat, bi biolin, biola eta basso continuo-rentzat idatzia dago. Pergolesik bere tuberkulosi gaitzaren azken egunetan idatzia dela esan ohi da, 26 urte zituenean. Pozzuolin (Napoli, Italia) dagoen Frantziskotar monastegi batean. Hau idazten bukatu eta berehala hil omen zen, esan bezala, 26 urterekin».

Bestelako berezitasunik ere izango du emanaldiak. Hala, jantzi berriak estreinatuko ditu taldeak. Izan ere, Amaia Albes diseinatzaile arrasatearraren eskuetan utzi zuten taldearen uniformearen diseinua, eta Arantzazuko kontzertuan izango da aurrenekoz emaitza ikusteko aukera. Abesbatzaren hitzetan, Amaiaren filosofia, taldearen izaerarekin bat dator, «emakumea delako, eskuz lan egiten duelako, berritzailea delako, profesional ezinhobea delako, mimoz eta maitasunez josten dakielako eta lana txukun eta fin egiten duelako».

Sarrerak (10 euro) aldez aurretik daude salgai Oñatiko Txokolaiteixan, Plazako makinan eta www.oñati.eus atarian. Gainera, autobusa antolatu dute propio Arantzazura joateko eta kontzertua amaitutakoan Oñatira bueltzatzeko.

Temas

Euskera
 

Fotos

Vídeos