Internazionala

Iñigo Lamarca
IÑIGO LAMARCA

Ezkerreko alderdiek kantatzen zuten kantu ederra da Internazionala. Txina komunistak kapitalismo sutsuena praktikatzen duen honetan erlikia bat baino ez da, edukirik gabe geratu dena, arrazoi estetikoak salbu. Internazional Sozialista izeneko entitate bat ere bazen (baita internazional komunista bat ere). Alderdi sozialista eta sozialdemokratek beren politikak koordinatzeko helburuarekin sortu zen. Behar beharrezkoa da, jakina, politika publikoak kontrastatzea, iritziak partekatzea, eta eztabaidak eragitea. Alderdi kristau-demokratek ere sortu zuten beren internazionala. Dena den, topagune horiek ezerezean geratu dira, ezer gutxirako balio dute, Espainiak eta Portugalek Latinoamerika herrialdeekin egiten dituzten gailur iberoamerikarrak bezalaxe. Gaur egun, funtzionala den gailurra Suitzako Davosen egiten dena da. Hilaren 22an hasiko da 49. topaketa. Laugarren iraultza industriala (edo 4.0. globalizazioa) izango da mintzagaia. Klaus Schwab enpresari alemana da elur artean ospatzen den Foro Ekonomiko Mundiala bultzatu zuena, eta hor jarraitzen du eztabaida-gune inportante honen atzean, etorkizunari aurrea hartu nahian. Tipo argia eta azkarra da, eta guztiz interesgarriak izaten dira hango eztabaidak. Aurten ez da Trump joango, bere denbora guztia Estatu Batuek Mexikorekin duten mugan harresi handi bat eraikitzeari dedikatzen ari baitzaio.

Bien bitartean, munduko ekonomia krisi baten atarian dago eta berotegi-efektuaren ondorioak gero eta larriagoak dira kliman eta ingurumenean. Espero dezagun gai horiek behar bezalako zorroztasunarekin aztertzea Davosen, eta batez ere han bilduko diren ahaltsuak (politikari, enpresari, lobbista eta itzal handiko pertsonak) neurri eta ekintza zuzenak hartzea lehenbailehen ate joka ditugun mehatxu erraldoiak uxatxeko.

Eskuin muturrak bai eraiki duela internazional sendoa. Konturatu garenerako sare zabala du egina eta, aditu bikainen laguntzarekin, maisukiro ikasi du mugitzen 4.0 globalizazioaren eremuan iritzi publikoan eragina izateko helburuarekin. Komunikabide klasikoek (egunkariek, batez ere) eragin eskasa dutela esango nuke. New York Times periodikoak harpide kopurua dezente igotzea lortu du baina Steve Bannon Trumpen aholkulariari bost axola zaio hori. Badaki Twitter, Facebook edo sakeleko telefonoko komunikaziorako aplikazioak (whatsapp eta beste batzuk) direla tresna egokienak mezuak zabaltzeko. Gainera, egunkarietan kazetariak dira berriak sortzen dituztenak eta eskuin muturreko ideologoek hori ez dute gogoko, egia argitu eta zabaldu egin behar dutelako kazetariek, beraien kode deontologikoaren arabera. Haientzat, berriz, printzipio etikoak oztopo galanta dira, eta edozerk balio du (baita gezurrak ere) emozioak pizteko, haserrea eragiteko eta jendea eskuin muturrera eramateko. Gezurra trebeki erabiltzen ondo asko zekien Goebbels naziak. Azken aldian, 'fake news' edo berri faltsuak izugarri zabaldu dira sare sozialetan. Nork sortzen ditu? Eta nola? New York Magazine aldizkariak dioenez, interneteko sareetan dagoen trafikoaren %40a inteligentzia artifizialak sortzen du, hau da robot informatikoek ('bot', ingelesez).

Enpresa eta pertsona askorentzat oso inportantea da, adibidez, Google edo beste nabigatzaile baten bidez egiten ditugun bilaketetan goiko posizioetan egotea. Horretarako badaude programa informatikoak ,zeintzuek etengabe sakatzen duten izen edo wegbune bat, Googleren zerrendan hasierako postuetan egoteko.

Robert Habeck Alemaniako Berdeak alderdiko buruzagikideak sare sozialak alde batera utziko dituela iragarri du. Twitterren balorazio negatiboa jaso zuten zenbait mezu sartu zituen. Bestetik, Alemaniako politikari askoren kontuetan (eskuin muturrekoenetan izan ezik, a ze kasualitatea) sartu egin dira (pirateatu edo hackeatu egin dituzte), eta datu piloa eskuratu dituzte, batek daki zein helbururekin (hauteskunde kanpainan edo beste edozein momentutan beraien argazkiak edo datuak plazaratzeko xedez, adibidez, beraien irudia edo izena zikintzeko). Estatu Batuetan, Alexandria Ocasio-Cortez diputatu demokrata eta sozialista gaztearen aurka kanpaina erasokorrak plazaratu dituzte bere irudiak erabiliz (hala ere, bere populartasunak gora egin du eraso horien ostean).

Steve Bannon (pertsona oso argia; erne) Europan lekutu da. Brexit gogor baten alde ari da lanean, eta Europako eskuin muturreko talde eta liderrei (Le Pen, Salvini, Orbàn, Abascal eta abarri) laguntza eta aholkularitza bikaina ari zaie ematen (Brasileko Bolsonaro presidenteari ere bai). Aipaturiko politikariek oso harreman estua dute beren artean, eta Europako Parlamenturako hauteskundeetan emaitza ona lortzea dute helburu nagusienetakoa. Estrategia eta diskurtso eraginkorrak ari dira erabiltzen. Maiatzeko hauteskunde europarrak inoiz baino inportanteagoak izango dira.