HAUTAGAIAREN IRRIBARREA

ARITZ GORROTXATEGI

Alderdiko hautagaiak hauteskunde kanpainarako argazki-saioa amaitu du. Kartelerako egindako argazkian irribarretsu ager-tzen da, orrazkera apur bat goraka, kalkulatuki desegina eta modernoa. Beti egiten du irribarre bera, ondo entseatua daukana. Politikoaren irribarrea. Irribarre azeria. Bere benetako bizitzan sarritan gainetik kendu nahiko lukeena, edo irribarre natural bati nahi baino gehiagotan gainjartzen zaiona. Kondena moduko zerbait bezala bizi du irribarre hori, profesionaltasunarekin egindako deabruzko itun bat bezala. Lanerako jartzen du, pilotariak gerrikoa edo epaileak toga jartzen duen bezala.

Ezin zaio irribarre faltsua deitu, dagoeneko hautagaiak ez baitu gezurretan antzezten. Hainbestetan jarri behar izan du, dagoeneko irribarrea eta bera bereizezinak bihurtu direla. Lanetik itzultzean ere, aurpegian itsatsita geratzen zaio oraindik, eta ezin du urarekin garbitu, makillajea kentzen den bezala. Irribarre polizoi horretaz dibortziatu nahiko luke, hark bere nortasuna lapurtu baino lehen. Psikologoak esan dio sindrome horri 'irribarre ordezkatzailea' esaten zaiola, eta gaitz zabaldua dela politikarien artean. Agian, politika utzita...

Baina nola utziko du hautagaiak politika hauteskundeen bezperan eta kartelean horren erakargarri agertzen bada? Eskuekin ere saiatu izan da aurpegiari tira egiten, ea irribarrea desitxuratzen duen. Baina alferrik. Bere buruaz barre egin behar duenean baino ez zaio irribarrea desagertzen. Gainera, irribarreak ez du hautagaiaren aurpegitik joan nahi. Hipotekak horren garesti egonda, hasi bilatzen beste aurpegi bat... Eta legea alde dauka, aurpegi berean 10 urtez jarraian bizi bazara, herritartasuna eskura baitezakezu.

Temas

Euskera