Denbora lapurrak

  Hitzordu batetara berandu heltzen denak zure denbora lapurtzen dizu

Arantxa Urretabizkaia
ARANTXA URRETABIZKAIA

Ez gara ba orain denbora zer den zehazten hasiko, batez ere erabiltzen ari garen hizkuntza honek denbora eta eguraldia bereizten dituelako. Adostu dezakegu, mesede hori egiten badidazu, denbora jaiotzen garenetik hil arte pasatzen dugun tartea dela. Zentzu horretan, denbora bizitzaren osagai nagusia litzateke.

Zertan erabiltzen duen gutako bakoitzak denbora, hori beste kontu bat da. Batez ere gaurko bizimoduan edozertarako ordua zehaztua dagoen honetan, ordularien diktadurapean bizi garen honetan, minutuz minutu. Gaur ez dute balio lehen erabilgarri ziren irizpideak, ilunabarrean, eguna argitu bezain laster ... Ordulariak edo sakelakoak minutu zehatza esaten dizu, zuk gogoan ez baduzu ere.

Kontua gehiago korapilatzeko, niretzat denbora galtzea dena zuretzat, agian, denbora aprobetxatzea da edo, besterik gabe, bizitzea. Gainera, ez dira falta denbora urre gisa erabiltzen dutenak, besteen denborarekin urrea pilatzen dutenak, besteen denbora baliatzen dutenak.

Azken puntu horrek marrazten du duela gutxi entzun dudan esapidea: ba omen dira gainerakooi denbora lapurtzen diguten pertsonak, enpresak eta administrazioak. Izan ere, lehen enplegatu batek egiten zuena zerorrek egin behar duzu orain. Gasolindegian, janari dendan, hondakinak birziklatzeko orduan, banketxean, telefonoz deitu eta ahots batek itxaroteko esaten dizunean...

Gehitu horri pertsona pribatuek lapurtzen dizuten denbora. Geratzen zara edonorekin ordu zehatz batean, ordulariz inguraturik bizi garen honetan, eskumuturrean daramazun ordulariak eta sakelako telefonoak ze ordutan bizi garen esaten dizun honetan eta agindutako orduan heltzen bazara, zain egoteko aukera ugari duzu. Berandu heltzen denak, irribarrez bada ere, denbora lapurtu dizu, zure denboraren zati bat.

Noski, lapurraren denbora urre gorria delako eta zurea ikatza. Horrelakorik ahoskatu ala ez, hori da sendagileak, dentistak, ile-apaintzaileak egiten dizuna, esaten dizu berak ezin duela minutu bat bera galdu, baina zuk bai ordu erdia, zure denborak bereak baino askoz gutxiago balio duelako.

Zartaginaren kirtena eskutan duenak egin dezake hori edo, behintzat, zure gainetik dagoela uste duenak. Barkamena eskatuko dizu ala ez, baina ez du zurekin bere buruarekin erabiltzen duen neurria baliatuko. Hain zuzen, zure bizitzak gutxi balio duelako.