Zugarramurdira ibilaldia asteartean Gazte Izanak elkartearekin

Oiartzungo jubilatuek badute plana iraila eta urrirako./GOIZARIN
Oiartzungo jubilatuek badute plana iraila eta urrirako. / GOIZARIN

Halty bentan egingo dute bazkari-legea, Saran

GOIZARINOIARTZUN.

Gazte Izanak elkarteak antolatuta, irailaren 17an, asteartearekin, Zugarramurdi eta Sarara ibilaldia egingo da animatzen diren herritarrekin. Goizeko 08:30ean jarri dute hitzordua, ikastolako aparkalekuan. Handik abiatu eta Zugarramurdi aldera joko dute. Bertan gosaldu ondoren hain ezaguna den kobazuloa bisitatuko dute baita herriko txokoak ezagutu ere. Bazkaria, berriz, Saran egingo dute Halty bentan. «Zikiro menua egingo dugu», adierazi dute antolatzaileek.

Behin Xareta bailaran ibili ondoren, Donibane Lohizunera joango da espedizioa. Zalantzarik gabe, Lapurdiko kostaldean identitate euskalduna hobekien gorde duen herrian barrena paseo bat egingo dute iluntzeko 19:30ak arte. Azkenik, Oiartzun aldera abiatuko dira, 20:30ean etxeratzeko.

Fermin Lorza Gazte Izanak elkarteko lehendakariak adierazi du oiartzuar guztientzat prestatu dutela irteera. Hortaz, interesatuek irailaren 16a bitarte izena eman dezakete elkartean (goizeko 10:00etatik 12:00etara bitarte), 35 euroren truke.

Urrian Andaluziara

Herriko jubilatuek Andaluziako hainbat txoko ezagutzeko hamar eguneko bidaia egingo dute urriaren 21etik 30era. Besteak beste, Sevilla hiria, Bejer de la Frontera, Cadizeko herri zuriak (Grazalema, Ubrique eta Arcos de la Frontera), Sanlucar de Barrameda, Chipiona, Cadiz hiria, Jerez, Puerto de Santamaria, Barbate eta Zahara de los Atunes, San Fernando eta Chiclana bisitatuko dituzte.

Herriko erretiratuek autobusez egingo dute Oiartzundik Zaragoza bitarteko bidea. Gero, Aragoiko hiriburuan AVE hartuko dute Sevilla bitarte. Bidaiaren prezioa 759 eurokoa da eta bakarkako logela nahi duenak 198 euro gehiago ordaindu beharko ditu. Iizen ematea goizeko 10:00etatik 12:00etara Gazte Izanak elkartearen egoitzan egin daiteke.