Xanistebanetan jai giroa nagusi

Umore ona izan zen nagusi koadrileen arteko jokuetan. / ARGAZKIAK ARIZMENDI
Umore ona izan zen nagusi koadrileen arteko jokuetan. / ARGAZKIAK ARIZMENDI

Herriko gazteek alaitu eta girotu zituzten atzo, euren egunean, Oiartzungo kale eta txokoak | Haurren Eguna ospatuko da gaur eta Doneztebe plaza kolore gorriz jantziko da

GARAÑO OIARTZUN.

Aurtengo xanistebanetan oiartzuarrak ederki gozatzen ari dira. Eguraldia lagun izan dute egun guztietan eta eguzkiak ederki berotu ditu oiartzuarrak. Lehen egunetik eskaintza zabala izan dute herritarrek: dantza, gastronomia, kirola, musika, ikuskizunak, kale animazioa... Atzo egun mundiala izan zen. Horiz jantzitako gazteak edonon ikusten ziren; plaza guztia bete zen bazkarian eta sonbrila eta jaimekin eguzkitik ihesi ikusi ziren zenbait gazte. Bazkalostean bingo umore-tsua egin zuten eta gero koadrilen arteko jolasak. Giro ederrean zeuden herriko gazteak. Arratsaldea borobiltzeko, berriz, Elektrotxufla taldearekin poteo musikatua. Gorputza ederki astindu ahal izan zuten gazte oiartzuarrek.

Arratsaldeko ekitaldiak ere oso giro ederrean ospatu ziren. Aipagarria Hau ez da kasualitatea bertso saio feminista jendetsua izan zen Kaxkazuri plazan. Karaokera hurbildutakoek hainbat euskal kanta abesteko aukera izan zuten eta baita koreografiaren bat dantzatu ere. Tio Teronen Festamentua ikuskizunak oso harrera ona izan zuen eta ordu txikiak arte Ezten Giro erromeriak dantzan jarri zuen Landetxeko plaza.

Haurren egunarekin agur

Aurtengo xanistebanak amaitzera doaz eta gaurko Haurren Eguna topera bizitu nahiko dute oiartzuarrek. Hala, goizeko 10:30etan Haurren Esku Pilota Txapelketaren finalak, binaka, jokatuko dira Kon-tzejupean. Gero, Gaztetxoen danborradaren txanda izango da. 12:00etan, berriz, Oiartzungo herri musika eskolaren kale bueltak. Gero, Arkume erretzea: Arkumea burduntzian, a ze poza tripan sartzerakoan herri-poteoa eta 14:30ean, arkume jatea izango da Doneztebe plazan.

Gero, arratsaldeko 16:30ean, xanistebanetako XXIII. Truk Txapelketa Madalensoro pilotalekuan. 16:00etatik 20:00tara, Haurtzaro Ikastolako jolastokian quad-ak, foro-koiote, gomina, indioak, txirrista eta fantasia puzgarriak. Den-dena doan, 3 urtetik 14 urte bitarteko haur eta gaztetxoentzat. Horren ostean txokolatada bertaratu diren guztientzat. Jarraian, 17:00etan hasita, Elorsoron areto-futbol txikia, Xanistebanetako txapelketako finalak jokatuko dira. Azkenik, Herri Bilguneak antolatuta, Aitor Txiki VI. Areto-futboleko txapelketaren finala.

Azkenik, gaueko 23:00etan, Altxa Porru taldearen emanaldia hasiko da eta 23:30ean Elizaldeko kaleetan zehar, zezen suzkoa ibiliko da.

 

Fotos

Vídeos