Uxue Muñoa eta Maitane Irurzun dantzariek irabazi dute Oiartzungo Aurresku eta Soinu Zahar txapelketa

Igandeko protagonistak, Elorsoro kiroldegian. / GOIZARIN
Igandeko protagonistak, Elorsoro kiroldegian. / GOIZARIN

Elizalde dantza taldeak antolatutako kanporaketan 29 dantzarik parte hartu dute, bi sailetan banatuta

GOIZARIN OIARTZUN.

Adunako Maite Irurzun eta Oiartzungo Uxue Muñoa dantzariek irabazi dute Oiartzungo Aurresku eta Soinu Zahar txapelketako kanporaketa. Igandean, Oiartzungo Udalak lagunduta Elizalde dantza taldeak eta Gipuzkoako Euskal Dantzarien Biltzarrak antolatuta jokatu zuten Oiartzungo kanporaketa Elorsoro kiroldegian eta bi dantzari horiek izan ziren epaimahaikideen ustez onenak.

Guztira 29 dantzarik hartu zuten parte Oiartzungo Aurresku eta Soinu Zahar Txapelketetan: alde batetik, 11-13 urte bitarteko 14 dantzari, D sailakoak; 14-15 urte arteko 15 dantzari, B sailakoak, bestetik.

Dantzarien lana epaitzeko Euskal Dantzarien Biltzarreko Nagore Indakoetxea errenteriarra, Xabier Mendizabal donostiarra eta Maria Ferreiro elgoibartarra aritu ziren, Errenteriako Estibalitz Iturria idazkariarekin batera. Haien arabera, dantzari irabazleak hauexek izan ziren: Oiartzungo Aurresku eta Soinu Zahar txapelketako B sailean, 1. Uxue Muñoa (Oiartzun). 2. Irati Arsuaga (Oiartzun) eta 3. Olatz Azkue (Lezo); D sailean, berriz, 1. Maitane Irurzun (Aduna) 2. Mattin Etxebeste (Oiartzun) eta 3. Maren Goya (Amasa-Villabona).

Andoitz Apaolaza Elizalde Herri eskolako zuzendariak eta Xabier Mendizabal eta Maria Ferreiro epaimahaikideek banatu zituzten igandeko sariak.

Idoia Leonet aurkezleak oholtza gainean dantzan aritu ziren neska-mutil guztiak zoriondu zituen, amaieran; izan ere, egindako lana ez baitzen makala izan eta maila altua zutela erakutsi zuten. Txistularien lan bikaina ere goraipatu zuen, haiek gabe ez baitzegoen txapelketarik.

Elorsoroko harmailetan bildu ziren ikusle-entzuleek txalo zartarekin eskertu zuten denen eginahala. Bukatzeko, irabazleek agurra eskaini zuten.