Udalak Kirol arloko diru laguntzen ordenantza onartu du

2020ko herriko jai egun ofiziala abenduaren 26a izango da

GOIZARIN OIARTZUN.

Pasa den asteartean apirileko ohiko udalbatzarra ospatu zen eta bertan herriko eragileekin hitzarmenak onartu ziren: El Watan elkartearekin (Saharako errefuxiatu guneetarako 13.000 euroko laguntza), Ibargain Musika Eskolarekin (ikasle oiartzuarrentzako bekak) eta Euskaraz Kooperatibarekin (Intxixu AEK euskaltegian ikasteko bekak).

Kirol elkarteen funtzionamendurako diru-laguntzen ordenantza ere onartu zen, aho batez. Hortaz, Gipuzkoako Aldizkari Ofizialean publikatzen den biharamunetik egin ahal izango dira eskaerak.

Xorrola Mugi txartelean sartu ahal izateko, Gipuzkoako Garraio Agintaritza Partzuergoan sartzea erabaki zuen otsaileko udalbatzarrean Oiartzungo Udalak eta Eneritz Arbelaitz alkateordea izendatu zuen bertan ordezkari. Partzuergoko estatutuek hala eskatuta, azkeneko udalbatzarrean Arbelaitzen ordezkoa Jexux Leonet alkatea izatea onartu zen aho batez.

Xorrolarekin lotuta, zerbitzuaren esleipen prozedura bukatu artean (martxan dago), Cuadrabus enpresarekin luzapen-kontratua egitea adostu zen, aho batez.

Hiri-hondakinen bilketarako bi ibilgailu berri erostea ere onartu zen, (EAJ Abstenitu). 408.672 euro inbertituko da hondatuta dauden ibilgailuak berritzen.

Bestalde, 2020an ere abuztuaren 3a izango da herriko jai egun ofiziala, eta 2020ko jai egun ofiziala ere izendatu zen astearteko udalbatzarrean: abuztuaren 3a, astelehena, izango da.

Atez ateko bilketa

Eskari-galderen atalean Rafael Bergaretxe EAJko zinegotziak hondakinen atez ateko bilketa sistema birplanteatzeko eskatu zion EH Bilduri, eta gaiaren inguruan «jarrera itxia» edukitzea egotzi.

Jexux Leonet alkateak gaiak «hauteskunde atarian kutsu elektoralista» zuela aipatu zuen eta gogorarazi «lau urtean EAJk ez duela proposamen bakar bat egin gaiaren inguruan». Era berean, Leonetek Oiartzungo bilketa sistemak dituen datu onak (bilketa kopuruan eta bildutakoaren kalitatean) azpimarratu zituen, «hori oiartzuar guztiek lortzen dute, eta ez EH Bilduk». Ongi egiten dena ongi egiten jarraitzeko konpromisoa berretsi zuen gobernu taldeak; «oiartzuarrek ez dute beste erremediorik», erantsi zuen Bergaretxek.

Bergaretxe jeltzaleari ez zitzaion gustatu hauteskunde giroaren aipamena. «Nik ere nahiago nuke erraustegia ez balitz behar eta hemendik 20 urte barru itxiko balitz», gehitu zuen EAJko zinegotziak.

Eneritz Arbelaitz Ingurumen zinegotziak ere erantzun zion EAJko ordezkariari: «Oiartzun konprometitua dago hondakinen gaiarekin eta ingurumenarekin; edozein hobekuntza-proposamenetara irekiak gaude, baina ez dugu atzerapausorik emango ongi funtzionatzen duen gai batean».