Tren Berdea Arditurrira ailegatu zen

Tren Berdea Arditurrira iritsi zen Pazko Asteko larunbatean. /  GOIZARIN
Tren Berdea Arditurrira iritsi zen Pazko Asteko larunbatean. / GOIZARIN

Maiatzaren 12an eta ekainaren 2an sai arreak behatzeko bisita gidatuak errepikatuko dira

GOIZARIN OIARTZUN.

Pasa den Pazko Asteko larunbatean Tren Berdean Arditurriko meaguneraino hurbildu eta bertan meategia bisitatzeko aukera eskaini zuen Arditurriko Parketxeak. «Gure eskaintzak harrera beroa izan zuen», adierazi zuen Itsaso Aritzeta arduradunak. «Eguraldia ez zen oso atsegina izan baina hala ere familia ugari etorri ziren gurera». Plan itzel hau benetan oso gustukoa da familien artean, eta horrexegatik, datozen hilabeteetan ere antolatzen jarraituko dute Arditurrin.

Bestalde, pasa den igandean Aiako Harrian bizi diren sai arreei buruzko argazki erakusketa zabaldu zen Arditurri parketxean. Hamar argazki daude ikusgai eta ekainaren 2ra arte egongo da. «Bertan, Aiako Harrian bizi diren sarraskijale horien argazkiak ikusgai egongo dira. Urte askotan behaketa lanean aritu den Pako Garcia oiartzuarraren argazkiak dira», argitu du Itsaso Aritzetak. Badira 20 urte Garcia hegazti horien behaketan zela handia dela.

Sai arreak behatzeko bisita gidatuak antolatuko dituzte Arditurri parketxeko arduradunek, maiatzaren 12an eta ekainaren 2an ere. «Irteera gidatuan Aiako Harrian habiak egiten dituzten hegazti sarraskijale horien bizimodua eta ohiturak hobeto ezagutzeko parada izango dute interesatuek», adierazi du Aritzetak. Arditurri parketxean sai arreen inguruan hitzaldi labur bat egingo da lehenik, eta ondoren, ibilaldi motz bat hegazti horiek teleskopio bidez ikusteko. Hitzaldiak bi txandetan egingo dituzte: euskaraz 10:00etan eta gaztelaniakoa, 10:30ean. Ondoren, bi taldeek bat eginez ibilaldia egingo dute goizeko 11:00k aldera.

Plaza mugatuak

Bisita gidatua 5 euroren truke egin daiteke baina, aurretik erreserba egitea beharrezkoa izango da, plaza mugatuak baitaude eta horretarako Arditurri parketxera edota Errenteriako turismo bulegora deitu daiteke (turismoa@oarsoaldea.eus - 943 49 45 21). Informazio gehiagorako edo erreserba egiteko: 943 49 50 69 / 688 89 50 68 telefono zenbakira deitu daiteke; arditurri@gipuzkoamendizmendi.net helbidera idatzi edota www.parketxesarea.org/arditurri orrialdea bisitatu. Bestalde, bisita egunean prismatikoak eramatea gomendatzen da.

Más