RAFAEL BERGARETXE (EAJ-REN HAUTAGAIA): «Atez ateko bilketa sistema aldatu nahi dugu»

Aldundia eta Jaurlaritzarekin elkarlanean, EAJ/PNV-k hainbat proiektu bultza nahi ditu herriarentzat

GOIZARIN OIARTZUN.

Rafael Bergaretxe kanpaina «interesgarria» bizitzen ari da egunotan eta hainbat lan-ildo ditu buruan datorren legealdirako. Besteak beste, «atez ateko bilketa sistema aldatu, erraztu eta hobetzea».

-Oiartzunen EAJ-PNV alderdiaren zerrenda buru zara. Oiartzuarren erreferente ikusten al duzu zeure burua?

NAN
Jaioterria
Oiartzun.
Ogibidea
Hezkuntza Saileko Ikuskaria.
Zaletasunak
Literatura, musika, mendia, itsasoan igeri egitea, bidaiak.

Hautagai-taldea eta alderdia ikusten ditut nik Oiartzunen erreferente. Hemen, EAJ-PNV berritua ari da herrigintzan; jendeberritua, indarberritua, eta gogoberritua. EAJ-PNV erreferente politiko klabea izan da, eta da Oiartzunen eta udaletxean: 1936an frankistek suntsitu zuten udal-batzarrean EAJ-PNVko zinegotziak eta alkatea ziren nagusi. Frankismoaren ondorengo lehen bi agintaldietan EAJkoa izan zen alkatea eta, orain arteko agintaldi guztietan udalkide izan diren zinegotzi ohiak aurkezten ditugu gure zerrendan. Belaunaldi berrietako gazte jendearen kemenarekin batera, iraganean ongi egindako lanaren eredua etorkizunera proiektatu nahi dugu.

-Zein balorazio egiten duzue aurreko legegintzaldiaz?

-Argiuneak eta ilun-uneak izan dira. Alkatetzarekin eta zinegotziekin zuzena da harremana. Ahalegina egin da harremana zaintzen, komunikazioa errazten. Adostasuna ere egon da gai askotan. Urteko arau inportanteenean, aurrekontuenean, aldeko botoa eman dugu 2018koan. Beste urteetako aurrekontuen botazioetan, berriz, abstenitu egin gara. Baina badira gai batzuk aurrerabiderik ikusten ez dugunak: zabor-bilketa sistema, Urkabe Baita etxaldea, eremu, bide, eraikin publikoen zainketa eta txukunketa edo ikur eta propaganda politiko unilateralaren presentzia permanentea, besteak beste.

-Zeintzuk dira Oiartzungo EAJ/PNVren lan-ildo nagusiak datorren legealdirako?

Ildo nagusia: herritarrak ongi izatea; horretarako udalak ongi egitea, Aldundia eta Jaurlaritzarekin elkarlanean. Garraio publiko guztien ebaluazio sakona egin eta intermodalitatea bultzatzea. Herriko zaharrei arreta egin eta laguntza ematea. Atez ateko bilketa sistema aldatu, erraztu, hobetzea, errefusa eta organikorako kontenedore chip-dunak jarrita. Elizalderako 'Urkabe Baita' eskuratzea parketarako. Eremu, bide, eraikin publikoen zainketa hobea. Estetikari arreta. Trafikoaren azterketa integrala, arazoak neurtu, aztertu eta aurrea hartzea.

-Nola bizitu duzu aurre-kanpaina?

-Askotan parte hartua naiz. Guztiak dira diferenteak. Oraingoa, apirilekoaren ondotik, bereziagoa gertatzen da. Interesgarria.

-Zein da gaurko egoera ekonomikoaz duzun iritzia?

-Badago zer hobetua, baino askoz okerrago egon gara aspaldi ez dela. Oiartzunen langabezia tasa %6,5eko da. Herritar batzuk baztertuta geratzeko arriskuak ardurarazten gaitu.