Oroimenaren astearen baitan 1936an errepresaliatutako zinegotziak gogoratuko dira

Lurdes Herrasti eta Aiako Harria Gaztelumendiren hitzaldia astelehenean burutu zen. / KOXKO
Lurdes Herrasti eta Aiako Harria Gaztelumendiren hitzaldia astelehenean burutu zen. / KOXKO

Aitortza ekitaldi xume eta intimoa egingo zaie larunbatean

KOXKOOIARTZUN.

Aurreko ostegunean izan zen 1936ko altxamendu frankistaren 83. urteurrena, hori dela eta, Oiartzungo Udalak eta Kattin Txiki elkarteak Oroimenaren Astea antolatu dute aste honetarako.

1936ko uztailaren 27an hartu zuten matxino frankistek Oiartzun, Beorlegi eta Ortiz de Zarate koronelek gidatutako tropak Ergoien auzotik sartuta. Egun horretan bertan, oiartzuarrek zilegitasun osoz aukeratutako udalbatzarra desegin zuten frankistek eta zortzi zinegotzi abertzale atxilotu. Hurrenez hurren, Feliziano Belderrain Agirre (alkatea), Leontzio Aranburu Agirre, Manuel Irigoien Mitxelena, Segundo Berrondo Retegi, Jeronimo Ugaldebere Labandibar, Esteban Goienetxe Arozena, Luziano Aristizabal Etxeberria eta Jose Ignacio Odriozola Oiartzabal.

Guztiek pairatu behar izan zuten frankisten zapalkuntza. Zituzten ondasun urriak lapurtu zizkieten, erbesteratuak izan ziren, kartzelaratuak, trabajadoreen bataloietara bidaliak... Halaber, Aranburu eta Mitxelena fusilatu eta desagerrarazi egin zituzten, baita Berrondoren 18 urteko semea ere, baserrira bila joan ostean aita aurkitu ez zutelako.

Zortzi hautetsi abertzale horiei oroimen eta aitortza ekitaldi xume eta intimoa egingo zaie larunbatean, hilaren 27an.

Erakusketa eta hitzaldiak

Aste berezi honetarako hainbat ekintza daude aurreikusiak. Alde batetik, 'Lur azpitik lur azalera' erakusketa iganderaino egongo da ikusgai udaletxean, Ezkaba mendian geratutakoa jasotzen duena.

Bestalde, astelehenean izan ziren '1936ko altxamendua genero ikuspuntutik' hitzaldia, Lourdes Herrasti antropologoaren eskutik, eta Aiako Harria Gaztelumendi irakasleak sortu duen Oroimenaren harra unitate didaktikoaren aurkezpena.