Omenaldi beroa jaso du Nerea Abancens Calvo 'Napo' OKE-ko kapitainak haren agurrean

Familiako argazkia ekitaldiaren amaieran. /  GOIZARIN
Familiako argazkia ekitaldiaren amaieran. / GOIZARIN

Makina bat igoera faseetan parte hartu ondoren, bi urtez 1. Mailako Liga Iberdrolan jokatu zuen kapitainak

GOIZARIN OIARTZUN.

Pasa den larunbat arratsaldean, hamarnaka futbolzale, lagun eta familiako kideek omenaldi beroa eskaini zioten Nerea Abancens Calvo 'Napo' OKEko emakumeen 2. Mailako kapitainari. Hamaika urtez futbol jokalari izandakoak azken partida jokatu zuen Karla Lekuonan eta haren amaieran jaso zuen merezitako omenaldi gozoa. Makina bat igoera faseetan parte hartu ondoren, bi urtez 1. Mailako Liga Iberdrolan jokatu zuen 'Napo'-k.

Hamaika urte horiek oso oparoak izan dira Oiartzunen bizi den futbol jokalariarentzat. Emozioz beteta eskertu zituen Oiartzun Kirol Elkartea eta haren familia osoa. «Hamaika urte ondoren, eskerrik asko bihotz-bihotzez Oiartzun eta Ugaldetxo, eman didazuen guztiagatik. Ezin izan dut zoriontsuagoa izan, ezin izan zaitut gehiago maitatu», zioen. Oiartzun Kirol Elkartean 2008an eman zituen lehen urratsak eta orain esan dio agur bere futbol ibilbideari. «Bizitzan hartu dudan erabakirik zailenetarikoa izan arren, maitasun osoz agur esateko eguna iritsi da», aitortu zuen.

Txapela kapitainarentzat

Pradejon taldearen aurka jokatutako partidaren amaieran jaso zuen 'Napo'k merezitako omenaldia. Bi taldeetako jokalariak, lagunak, familiako kideak... inguruan zituela, dantzari batek agurra eskaini zion. Gero, bere argazkia eta haren ibilbidea laburtzen zuen bertso dotorea zuen kamiseta jaso zuen, baita lagunek egindako oparia ere. OKEko lehendakariak mezu berezi bat idatzita zeraman txapela jantzi zion Oiartzun taldeko kapitainari. Horren ondoren, taldekideek eta lagunek kapitaina aireratu zuten. Jarraian, besarkadak, txaloak... etorri ziren. Familia argazkia egiteko ere baliatu zuten une berezi hori.

Larunbateko omenaldirako propio sortutako kamisetaren atzeko aldea bertso eder batez zegoen apainduta, non laburbiltzen da 'Napo'ren ibilbide oparoa OKE-n: «Ibili zaren lekutan/zure onena emanez/zelai barruan jokatuz/beti daukazun indarrez/defentsa lanetan fina/ta golak sartuz kopetez/ekipoko denei zainduz/parrez ta baita negarrez/zortedunak izan gara/zurekin bidea eginez/onean eta txarrean/asko maite zaitugu/ eta eskerrik asko bihotzez».

Oiartzun K E-Pradejon, 3-4

Pradejonen aurkako partidan hasiera kamutsa izan zuten oiartzuarrek eta errioxarrak azkar asko hasi ziren aurrea hartzen. Lehen ordu erdian sartu zituzten hiru tantoak eta Itsaso Maizak atsedenaldira joan aurretik sartu zuen etxekoen aurrena. Bigarren zatian, lan eskerga egin ondoren Oiartzun taldeak bi tanto sartu zituen, Napo eta Itsaso Maiza jokalariei esker. Nolanahi ere, Pradejonek sartu zuen laugarrena eta errioxarrak eraman zituzten hiru puntuak.

Oiartzun K E-Elgoibar: 0-2

Aurreko larunbatean, Karla Lekuona zelaian hogeita hamargarren jardunaldiari dagokion partida jokatu zen, Oiartzun eta Elgoibar taldeen aurkako norgehiagoka.

Kanpotarrek asko zuten jokoan eta indartsu ekin zioten partidari. Oiartzuarrak, berriz, puntu bakarra lotzeko ere zailtasunak izan zituzten. Gauzak horrela, Elgoibar aurreratu zen bigarren zatian eta etxekoek penalti bat aldeko izan bazuten ere ez ziren gauzatzeko gai izan. Gainera, bigarrena sartu zuten elgoibartarrek.