Oiartzun-Karaez senidetza irudikatzen duen artelana bihar inauguratuko da

Christian Troadeck Karaezeko alkateak, Oiartzungo Udalaren gonbidapena jaso zuen oiartzuarren eskutik. /  KOXKO
Christian Troadeck Karaezeko alkateak, Oiartzungo Udalaren gonbidapena jaso zuen oiartzuarren eskutik. / KOXKO

Tona bateko oroigarria da, bi herrien arteko 25 urteko lotura irudikatzen duena

KOXKOOIARTZUN.

Urte esanguratsua da aurtengoa, izan ere, 25 urte bete dira Oiartzun eta Karaez herrien arteko senidetza sortu zenetik. Hori dela eta, hilaren 18an abiatu ziren Karaez-Oiartzun senidetza taldeko hiru kide Bretainia aldera. Frantzia mendebaldean kokatuta dagoen herrialde honek, Euskal Herriarekin parekotasun asko partekatzen ditu, nazio berezi bezain indartsua da, hizkuntza, kultura eta izaera propioarekin.

Bi ziren bidaiaren helburuak, lehena, 25 urteko lotura sendoa irudikatzen duen oroigarria Oiartzunera ekartzea. Bigarrena, Karaezko udaleko kideei xanistebanetako txupinazoa jaurtitzeko gonbita luzatzea. Christian Troadec alkateak gustura jaso zuen Oiartzungo Udalak eginiko gonbita, eta hemen izango da herri bretainiarreko beste lagun batzuekin batera. Atzo arratsaldean iritsi ziren eta harrera egiteko eta 25 urtetako harremanaren aitortza egiteko omenaldia prestatu du Oiartzungo Udalak gaur arratsaldean.

Inauguraketa eta afaria

Bihar, Arizmendi parkean izango da artelanaren inauguraketa. Nahiz eta parkea irekitzeko oraindik hilabete batzuk falta, bihar goizean zabalik egongo da edonorentzat. 12:00etan Doneztebe plazatik Arizmendi parkera kalejira moduko bat eginez hurbilduko dira.

Bestalde, afari herrikoia antolatu dute etzi, hilaren 3an. Girizia Elkartean izango da 21:00etan eta menu bikaina prestatu dute. Sarrerak 20 euro balio du eta Tolaitan, Mirenen eta Kastron daude salgai. Soilik 50 lagunentzat dago lekua, beraz, Karaezeko lagunekin afaltzeko plazerra izan nahi duenak bizkor ibili beharko du txartela eskuratzeko.