Oiartzun Ohorezko Neska Kadeteek liga irabazi dute

BASTEROBERRI OIARTZUN.

Oiartzun Ohorezko Neska Kadeteek bukatu berri den denboraldiko liga irabazi dute. Pasa den larunbatean jokatu zuten azken partida Lagun onak taldearen aurka, Ugaldetxon. Erraz hartu zituzten mendean, 5-2 irabazi zutelarik. Norgehiagokaren amaieran jaso zuten saria eta poz-pozik ospatu zuten lorpen bikaina.

Ospakizunak burutu ondoren, jokalariek zehatz-mehatz azaldu dute garaipenaren gakoa. «Irailetik hasi ginen pixkanaka-pixkanaka jokalarien artean ezagutzen, nahiz eta gehiengoak aurreko urtekoak ginen. Jokalari berriak iritsi ziren taldera, Jone Jaunarena eta Janire Cienfuegos, baina hasiera-hasieratik bat egin zuten gurekin», dio Maddi Mujika jokalari oiartzuarrak. «Taldeko gaztetxoenak ere batu zitzaizkigun, Lore Delgado, Amaiur Errazkin, Maider Garaiar eta Aitziber Erasun hain zuzen. Haiek ere primeran moldatu ziren taldearekin hasieratik», gaineratu du. Talde bikaina gorpuzten joan zen, aurreko urtetatik Ohorezko Kadete Mailan jokatzen zutenekin batera: Ane Etxebeste, Izar Susperregi, Izaro Irastorza, Laiene Aranburu, Maddi Olasagasti, Maddi Mujika, Naroa Susperregi, Afrika Zapirain, Sara Blanco eta Uxue Louvelli. Eta ezin dituzte ahaztu haiekin batera liga irabazten lagundu dieten entrenatzaileak: Maria Igos eta Olatz Markinez hondarribiarrak. «Hasieratik haien helburua elkarren artean ongi moldatzea eta futbolean jolastuz guztiok ongi pasatzea izan zen, eta helburu horiek bete zirela ikusi zutenean, beste aurrerapauso bat ematea erabaki zuten gurekin batera: liga irabaztea», diote harro.

Eibar taldea, atzetik

Liga hasieran Eibar taldea zuten aurkari zuzena. «Hasieratik oso parekatuak genbiltzan, baina elkarren aurka jokatu ondoren, gure taldeak irabazi zuenez, aurreratu egin ginen eta hortik aurrera beti lehenengo postutik ez gara mugitu», aitortu dute jokalariek. «Lehenengo itzulian, partida bakarra galdu genuen eta berdinketa bakarra burutu; beste guztiak irabazi egin genituen. Bigarren buelta honetan, berriz, zailtasunak izan ditugu: Alde batetik, nahiz eta partidarik ez galdu, sei berdinketa egin ditugu eta beste aldetik hiru jokalari eta atezaina lesionatu zaizkigu» azpimarratu dute.

Eta txapeldunen sekretua ere azaldu dute: «gure artean, jokalari nahiz entrenatzaile artean, izugarrizko giro ona dago. Ezin hobeto moldatzen gara. Zelaian bat egitea lortzen dugu, partidak aurrera ateratzeko. Zelaitik kanpo ere elkartzen gara».

 

Fotos

Vídeos