Oiartzun Mugi sisteman sartzeko prozesua arrakastaz bete da

Oiartzungo hiribusean ere Mugi txartelak deskontuak eta hobariak eskainiko ditu

GOIZARINOIARTZUN.

Pasa den ostiralean, Gipuzkoako Garraioaren Lurralde Agintaritzako (GGLA) batzar orokorrak Oiartzungo Udala GGLAko kide izatea onartu zuen, Udalak hala eskatuta. Horrela, bada, egun Agintaritza osatzen duten gainerako erakundeek -Eusko Jaurlaritza, Gipuzkoako Foru Aldundia eta Donostia, Irun, Errenteria, Eibar, Zarautz, Arrasate, Hernani eta Lasarte-Oriako Udalek- aho batez onartu zuten kide berriaren sarrera.

Orain arte Oiartzungo hiribusean MUGI txartela erabiltzeko aukera zegoen arren, MUGI txartelak soilik txanpon-txartel bezala funtzionatzen zuen, eta hiribusak berezko tarifak zituen. Hortaz, Oiartzungo Udala GGLAn sartzearekin batera, Oiartzungo hiribusean ere integratutako gainerako garraiobideetan eskaintzen dituen hobari eta deskontuak eskainiko ditu MUGI txartelak, transbordoak eta tarifak ere gainerakoekin bateratuak izango dira.

Horrela, Gipuzkoako garraio publikoa erabili ohi duten pertsonek Oiartzungo hiribusean ere sistemaren abantailez gozatzeko aukera izango dute: ordaintzeko euskarri bakarra, eremuak bereizteko sistema komuna, erabileraren araberako deskontuak, garraio-aldaketak baldintza onetan, hobari osagarriak talde berezientzat...

Antonio Aizek adierazi zuenez, «Oiartzungo Udala GGLAn sartzea pausu garrantzitsua da Gipuzkoako garraioarentzat, MUGI sistema zabaltzera baitator, gero eta erakargarriago eta lehiakorragoa eginaz eta pertsona erabiltzaile berriak erakartzea ahalbidetuz».