Oiartzun 2018 urtekariaren 48. edizioa argitaratu da

GARAÑO OIARTZUN.

Uztaileko azken egunetan ikusi zuen argia Oiartzun 2018 urtekariak. Orain artekoak bezain mamitsua barrutik eta koloretsua, iaz bezala. Oiartzungo kale, etxe eta bazterrak beste behin ere alaituko dituen urtekari mardula. Aurtengoa 48. edizioa da. Beste behin ere, herriko kultura, historia, kirol, hezkuntza eta beste hainbat arlotan urtean zehar egindakoak jaso dira liburuan.

Aurten, Xanistebanak iragartzen zituen kartela Iraitz Arabolaza Etxenagusiak irabazi zuen eta kartel bera da urtekariaren azala. Jaietako plazaren irudia eskaini zuen irudi alaitsu batekin.

2018ko edizioko artikulu aipagarrienen artean, Jexux Isasari, Baleio sagardotegiko nagusiari egindako elkarrizketa aurki genezake edo baita Oiartzungo auzoen mapa ere. Generoaren historiaz egindako erreportajeak ere bat baino gehiago harrituko du, emakumeari buruzko hainbat datu emanez. Urtekari osoa koloreetan ateratzen da aurten, iaz bezala, irudien kalitatea bermatuz. Beti bezala, argazki gogoangarriak ikus daitezke bertan.

Historia

Oiartzun urtekaria 1956. urtean jaio zen, batez ere, Santiago Aizarna idazleak jarri zuen gogo eta kemenari esker. Lehenengo alean, besteak beste, ondorengo partaide hauen idazlanak azaltzen dira: aipaturiko Santiago Aizarna, Lucas Landa, Andrés Gonzalez, Miguel Irigoyen, Manuel Lekuona, Francisco Michelena, Juan Maria Lekuona, Mariano Ostolaiz, Lexoti, Urriolabeitia tar Paul, Jesús Maria Ganzarain eta Juan Antonio Oyarzabalek.

Urtekariak jarraikitasuna 1959. urtera arte izan zuen, baina, gero, lau urteetan plazaratu ondoren, mututu egin zen. Gero, 1975. urtean Antonio Echeverria, alkateak, berriro martxan jartzea lortu zuen; eta, geroztik, urtero azaldu da eta aurtengoan 48. alea izango da.

Aurtengo alearen mamia

Atal ugariz eta aberatsez osatua datorkigu azkeneko urtekaria ere. Guztira, berrehun eta zazpi orrialdez osatua dago. Lan guztiak euskaraz idatzita daude. Jexux Leonet alkatearen hitzen ondoren, editoriala dator eta, geroago, edukia atalka banatuta.

Contenido Patrocinado

Fotos

Vídeos