Lertxunaren altxaerarekin hasi dira Iturriozko festak

Lertxunaren igoera asteazkenean izan zen./KOXKO
Lertxunaren igoera asteazkenean izan zen. / KOXKO

Asteazkena arte luzatuko dira jaiak, hainbat ekitaldirekin

KOXKO DVOIARTZUN@HOTMAIL.COMOIARTZUN.

Iturrioz astea festetan dago asteazkenetik. Lertxuna altxatu eta txupinazoa jaurti bezain pronto, jaietan murgildu zen auzoa. Aurten ia astebete luzatuko dira, uztailaren azken egunera arte, hain zuzen. Egitarau oparoa antolatu dute eta orain artean jende ugari biltzen ari da Iturriotz auzoan.

Ostegunean izan zuten goiz eresia Lartaun Txistulari Taldearekin, meza nagusia, idi-dema, baita urtero ospatzen den Iturriozko XXIX. Kronoeskalada ere, 100 haur inguruk hartu zuten parte. Amaitzeko, musika emanaldi paregabea izan zuten, Malen eta Ekain abeslari gazteen eskutik. Ostiralean, erretiratuen bazkaria egin zuten 14:00etan. Pintxo-potea eta enkarlada amaitu zenean, truk txapelketa izan zuten Iturri-Berri Elkartean; «Torreko» Xabi eta Anjel izan ziren garaileak. Hori gutxi balitz, 22:30ean monologoa izan zuten auzotarrek Mirari Martiarena «Pikoketa» eta Idoia Torregarairen eskutik. Barre artean igaro zituzten, beraz, eguneko azken orduak.

Atzo, eguraldi txarrari aurre eginez, bizikleta martxa egin zuten goizeko 10:00tan. Arratsaldean, iturrioztarren X. Sagardo dastaketa izan zuten eta bertan izan ziren Alaia Martin eta Ander Lizarralde herriko bertsolariak giro paregabea ipintzen. Larunbat gaueko protagonista musika izan zen, 22:30ean hasita emanaldia eskaini baitzuten The Pote´s eta Los Zopilotes Txirriaus taldeek, Gozo-gozo erromeri taldeak eta amaitzeko, Dj Elizkorrakek.

Datorren egitaraua

Gaur, Oiartzungo eskuzko Pasakako VIII. Txapelketako finala jokatuko da. Tortila txapelketa, txokolatada eta 'Gorriti show'- a ere izango dira egunean zehar. Malen eta Aneren musika saioak emango dio amaiera egunari.

Astelehenean atseden hartu ostean, asteartean jarraituko dute festek. Goizean, haur-jolasak eta pelota partidak izango dira. Gauean, aldiz, musika emanaldia eskainiko dute Ane Badiolak, Joxe Leon Kazabon eta Irati Odriozolak.

Azken egunerako ere ekintza ugari prestatu dituzte. Besteak beste, erromeria, giza-proba Emarriren eskutik, bazkaria, bingoa, puzgarriak, dantzaldia trikitilariekin... Beti bezela, zezen suzkoak ipiniko die amaiera festei.

Festetan zehar, merezitako omenaldi eta elkartasun keinu ugari jaso ditu pasa den apirilean zendu zen Ion Zabaleku 'Zapo'k. Festen antolaketan, herrigintzan eta hamaika kontutan sekulako laguntza eskaini zuen langile amorratuak.