Kontxa Murgia zenari omenaldia egingo zaio

Manuel Martinez Galiziako abertzaleen aitzindariaren ama gogoratuko dute, hiru egunez

GOIZARIN OIARTZUN.

Aurten ere Kontxa Murgia Egaña zenari omenaldia egingo dio Oiartzungo Udalak eta Pasaiako Fato Cultural Daniel Castelao elkarteak. Murgia oiartzuarra Manuel Martinez Galiziako abertzaletasunaren aitapontekoaren ama izan zen.

Aurtengo ospakizunak urtarrilaren 31n hasiko dira. Xosé Estévez historiagileak 'O Galeuzca: a rebelión da periferia' izeneko hitzaldia eskainiko du udal areto nagusian, arratsaldeko 19:00etan. Otsailaren 1ean izango du jarraipena omenaldiak, Galeuzka poesia errezitalarekin, musikaz lagunduta. Errezitatzen, Antton Kazabon idazlea, Xosé Estévez historiagilea eta Xabier Strubell musikaria izango dira. Musikariak ere ez dira faltako ekitaldian: Oihane Mitxelena, esku-soinuaz; Edurne Saizar, pianoaz; eta Haizea Lekuona, flautaz.

Saioa arratsaldeko 19:00etan hasiko da, udal areto nagusian.

Omenaldi ofiziala

Eta azken ekitaldia otsailaren 2an izango da Manuel Lekuona bibliotekan, bere jaiotetxean. Hitzaldi aretoan, Kontxa Murgia zenari lore eskaintza eta omenaldi ofiziala egingo zaio, goizeko 12:00etan. Jarraian, Iosune Cousillas Kultura Zinegotziak eta Xose Estévez historialariak hitzaldi bana eskainiko dute. Era berean, ANC, Gure Esku Dago eta Via Galegako kideek ere mintzatuko dira. Ekitaldiaren bukaeran bildutako guztientzat lunch goxoa zerbitzatuko da. Saioa Lartaun Txistulari Taldeak eta Trisquele Donostiako Galizia Etxeko Gaitero Taldeak girotuko dute.

Kontxa Murgia Egaña 1806ko urtarrilaren 29an jaio zen Oiartzunen eta 1854ko uztailaren 13an hil zen Santiago Compostelan. Bere aita, Domingo Murgia Azkonobieta irundarra, Doneztebe parrokiako organista izan zen. 1823an, San Luisen Ehun Mila Semeen inbasioarekin Gipuzkoako liberal askok Galiziara ihes egin zuten, tartean Domingok eta bere alabak. Han, Kontxa Jose Martinez botikariarekin ezkondu zen. Senar-emazteen lehendabiziko semea, Manuel hizkuntza galegoaren Rexurdimento-ko handietako bat izan zen.

Via Galegaren aurkezpena

Otsailaren 2an, Pasaiako Trintxerpe auzoan Via Galega plataformaren aurkezpena egingo da bertako udal aretoan, eguerdiko 12:00etan hasita. Besteak beste, Gure Esku Dago eta Asamblea Nacional Catalanako (ANC) kideek parte hartuko dute.

 

Fotos

Vídeos