San Juan suarekin hasi ziren atzo Altzibar auzoko festak

Ekaineko azken asteburuan San Pedro jaiak ospatuko dira

BASTEROBERRI OIARTZUN.

San Juan suarekin batera piztu ziren atzo Altzibar auzoko festak, jai giro ederrean. Festa Batzordeak egitarau oparoa prestatu du beste behin ere, hamaika ekimen ezberdinez josia, ekaina behar bezala agurtzeko. Izan ere, ekaineko azken asteburuan Altzibar auzoan San Pedro jaiak ospatuko dira.

Horrenbestez, ostegunean, hilak 28, arratsaldeko 18:00etatik 20:00etara puzgarriak jarriko dituzte auzoko haurren gozamenerako. Gero, 19:30ean pintxo-potea izango da txosna eta auzoko tabernetan zehar. Ostiralean, berriz, arratsaldeko 17:00etan Streebasket 3x3 lehiaketa jokatuko dute Gaztelekuko kantxan. 16 urtetik gorakoentzat, talde bakoitzak 4 jokalari beharko ditu izan. Eta 18:00etan festei hasiera emateko suziria piztuko dute. Segidan, txistulari eta buruhandiekin kalejira egingo dute auzoko bazterretan alaitasuna zabaltzeko. Horren ondoren, sabel-dantza erakustaldia izango da Martintxo plazan eta 20:00etan herriko preso, deportatu eta iheslarien aldeko elkarretaratzea, plazatik hasita. Azkenik, 21:00etatik aurrera, afari-merienda herrikoia auzoko plazan: tortilla jatea (urtero bezala, bakoitzak berea eramanda) eta sardina jatea (dohainik, dagoena bukatu arte). Afarian zehar itsaski-jan eder baten eta beste sari askoren zozketak egingo da.

Duatloia eta danborrada

Larunbatean, hilak 30, goizeko 10:30ean, 6 eta 14 urte bitarteko haurrek eta gaztetxoek IX. Duatloia jokatuko dute. Bizikleta eta kaskoa (derrigorrezkoa) norberak eraman beharko ditu eta parte hartu nahi duenak 10:30ean Arditurri Bidegorriko sarreran egon beharko du.

Eguerdiko 12:00etan, Altzibarko Martintxo plazan Toka txapelketa hasiko da. Eta 14:00etan auzoko jubilatuen bazkaria ospatuko dute Bazkun Zahar Berrin. Arratsaldeko 16:30etik aurrera, XXXIV. Truk Txapelketa jokatuko da, auzoko Esku Garbia elkartean. Izen ematea (12 euro bikoteko) 16:15ean itxiko da. Ordu erdi bat geroago, III. Ping-pong lehiaketa hasiko da Agerrealdeko parkean, 16 urtetik gorakoentzat.

Gero, 17:00etan Lur Korta eta Izaskun Mujikaren eskutik 'Bidaian' ipuin antzeztua hasiko da plazan. Eta 18:00etan, danborrarien txupinazoa eta poteoa Olaldeko etxeetatik hasita, danborradarako indarrak hartzeko. Hortaz, ilunabarreko 19:30ean, Altzibar auzoko haur eta helduen danborrada irtengo da.

Gaueko 00:00etan, zezensuzkoa ibiliko da plazako txokoetan barrena. Jarraian, DJ Mikeltxirekin dantzaldiari hasiera emango zaio. Aldi berean, DJ festa hasiko da Gaztelekuko txosnan.

Herri kirolak eta haur jolasak

Igandean ere, uztailak 1, ez da festarik faltako Altzibar auzoan. Goizean diana, VII. Pintxo lehiaketa eta euskal dantza eta dantza-jauziak, Haurtzaro Dantza taldea eta Helduen Tailerraren eskutik.

Arratsalde partean, berriz, haur jolasak, txokolate jatea eta aparren jolasa izango dira, haurren gozamenerako. Gero, 18:30ean, Herri kirolen txanda izango da, Aratz Mugerza eta Kañamaresen erakustaldiarekin. Eta aurtengo festekin bukatzeko, Apaletxeren kontzertu akustikoa. Azkenik, gaueko 22:30ean bukaerako traka mundiala.

Ea eguraldia lagun duten Altzibar auzoan ekaineko azken asteburuan hain egitarau oparoaz bete-betean gozatzeko. Merezi dute!

Contenido Patrocinado

Fotos

Vídeos