Juan Mari Lekuonaren bertsoak biltzen dituen liburua argitaratu dute

Jon Kortazar, Oihana Lekuona eta Iosune Cousillas. / GOIZARIN
Jon Kortazar, Oihana Lekuona eta Iosune Cousillas. / GOIZARIN

GOIZARIN OIARTZUN.

Juan Mari Lekuona zenak bertsolaritzaren inguruan idatzitako testuak editatu dituzte Jon eta Paulo Kortazarrek. 'Bertsoak' liburua argitaratu dute Pamiela etxean, Oiartzungo Udalaren eta Kutxa Fundazioaren laguntzaz. Liburua edizio zainduan dator, bere bertsoei buruzko azterketa batekin, apunte biografikoekin eta baita familiari esker lortutako argazki ugariekin.

Bertsoak maite zituen poeta handia zen Juan Mari Lekuona (1927-2005) eta bere burua maiz bertsogile gisa aurkeztu zuen. Azken liburu honek herri poesiaren alorrean eman zuena batu du, bere eskuizkribu argitaragabe bi jarraituz. 'Nere olerki eta kantak' deituriko koadernoan, bere garaian idatzitako olerki, kanta eta bertsoak bildu zituen txukun eta garbi. 'Egutegia 1999' izenburuan duen agendak, aldiz, bertso kopuru handia idatziz joan zen, testuak ezabatuz, azken bertsioa ontzat eman arte.

Juan Mari Lekuonak alderik pertsonalena erakusten du bilduman. Adiskidez beterik daude orriak. Ospakizunetarako egindako bertsoak dira gehienak, egun seinalatuetan kantatutakoak. Poetaren bertso zaletasunaren irudia dakar liburu horrek.

Ohorea eta poza,

Liburuaren aurkezpenean, Iosune Cousillas Oiartzungo Kultura zinegotziak gogora ekarri zituen Xabier Lete poeta eta abeslari oiartzuarrak Lekuonatarrengatik idatzitako ondorengo hitzak: «Lekuonatarren etxean, Etxetxikin, euskara eta herri kulturaren sakoneko hotsak nabari zitezkeen; etxe hartan herri jakintza baten adierazpen kultura nabari zitekeen».

Oihana Lekuona ilobak, berriz, argi adierazi zuen Juan Mari Lekuonaren familiarentzat ohorea izan dela eta poza sentitu dutela «osabaren lana, ondarea bizirik iraungo duen liburua argitaratu delako. Lan txukuna eta fina egin dute eta oso eskertuak gaude Kortazarrekin, Pamiela argitaletxearekin eta Oiartzungo Udalarekin».

Juan Maria Lekuona euskal olerkari, irakasle eta idazlea izan zen. Manuel Lekuonaren iloba, Gasteizko apaizgaitegian eta Erromako Unibertsitate Gregorianoan egin zituen apaiz ikasketak. 'Oianburu' ezizena erabiliz, Zeruko Argia, Olerti, Egan eta El Bidasoa aldizkarietan hasi zen idazten.

Poeta moduan nagusiki nabarmendu den arren, bestelako lanak ere egin zituen. 1987an euskaltzain oso izendatu zuten. Euskaltzale eta euskal ikertzaile-familia ezaguneko kide, nabarmena du ume-umetatik euskaraz izan duen prestaketa. Manuel Lekuona osabaren eragina ere argi asko suma daiteke ilobarengan, ahozko euskal literaturaz egindako ikerketetan.