Jatetxeetan euskaraz hitz egiteagatik saria Oiartzunen

Kanpainaren aurkezpenean parte hartu zuten lagunak. / GARAÑO
Kanpainaren aurkezpenean parte hartu zuten lagunak. / GARAÑO

Sarien artean herriko Zuberoa jatetxean bi lagunentzako otordua dago

GARAÑO OIARTZUN.

Otordua euskaraz egiteagatik hainbat sari banatuko dira Oarsoaldeko jatetxeetan eta horien artean Zuberoa jatetxean bi lagunentzako afari eder bat. Hain zuzen ere, hilaren 15etik azaroaren 15era, Lezoko, Oiartzungo eta Pasaiako jatetxeetan otordua euskaraz egiteak saria izan dezake.

Oarsoaldeko Euskara Batzordeak eta Lezoko, Pasaiako eta Oiartzungo udal euskara sailek, elkarlanean, zozketa antolatu dute, 'Euskara Oarsoaldeko Komertziora' planeko ekimen-sortaren barnean. 'Euskara saltsan' leloarekin jatetxeen gremioa ari dira lantzen aurten. Jatetxeetan euskaraz egiten duten bezeroei boletoak banatuko dizkiete. Boletoan, bertan dastatutako plater baten izena jarri eta horretarako prestatutako kutxan sartu beharko dute. Boleto horiek, gero, aipatutako zozketan hartuko dute parte.

Lezoko, Oiartzungo eta Pasaiako 81 establezimenduk hartuko dute parte ekimen honetan; Lezoko 21ek, Oiartzungo 25ek eta Pasaiako 30ek. Jatetxean jendaurreko idatzi, menu nahiz bestelako elementuak euskaraz (ere) dituzten eta zozketan parte hartu nahi izan duten guztiek, hain zuzen.

Honakoak dira parte hartuko duten Oiartzungo jatetxeak: Guru- tzen Toki Alai eta Malkorra; Ergoienen Tolare, Olaizola, Iriberri, Kapeo, Pikoketa eta Arritxulo. Altzibarren, berriz, Albistur eta Irundarrene; Iturriotzen Zuberoa eta Gure Txoko. Ugaldetxon, ordea, Intxixu, Ordo zelai, Esnoiz, Bikain, Talaia eta Tartalo; Arraguan Alhambra. Elizalden, azkenik, Kabitxo, Joxixionia, Laia, Amazkar, Tolaita eta Gazte izanak.

Herri bakoitzean seina boleto sarituko dira. Irabazleek boletoa entregatu zuten jatetxean erabiltzeko 50 euroko sei sari, hain zuzen ere. Horrezaz gain, Oiartzungo Zuberoa jatetxean bi lagunentzako afari eder baten zozketan sartuko dira.

Animo beraz, eta ekin euskaraz egiteari, bai jatetxeetan, bai gainerako establezimendu guztietan. Euskarak beti baitu saria! Egizue euskaraz eskualdeko jatetxeetan eta irabazi 50 euroko gastua doan egiteko aukera.

Contenido Patrocinado

Fotos

Vídeos