Iturriozko Santiyuk azken txanpan

Idi apustu mundiala izan zen, Telleria Mixiyuaren aurka. / GARAÑO
Idi apustu mundiala izan zen, Telleria Mixiyuaren aurka. / GARAÑO

GARAÑO OIARTZUN.

Gaur bukatuko dira Santiyuk eta ostiraletik hona hainbat ekintza egon dira auzoan. Ostiralean arratsaldeko 17:00etan haur jolasak izan ziren txikien gozamenerako. Ondoren, ur festa egin zuten eta bukatzeko apar festa. Bertaratu ziren haurrek ederki pasa zuten.

Arratsaldeko 19:00etan pintxo-potea izan zen kantinan eta Gure Txokon. 20:00etan Euskal Preso eta Iheslari politikoen aldeko enkartelada egin zen. Gauaz gozatzen jarraitu nahi zutenek, bokadiloak afaldu zituzten Beheko Soroan eta afalostean, 'Bocabits Comedia' antzerkia izan zen oholtza gainean. Bestalde, Truk txapelketa ere izan zen Iturri-Berri elkartean. Bikote askok eman zuten izena baina erredakzioa jada itxita zegoen irabazleak jakin aurretik. Irabazleek txapela, mariskada ederra eta arkume bat eraman zuten etxera. Bigarrenek, berriz, arkume bat eta langostino kaxa bat.

Larunbata egun biribila izan zen. Goizean goizetik, bizikleta martxa eta idi-dema izan ziren eta sekulako giroa egon zen. Eta arratsaldean, berriz, haur tailerrak lehenik, eta sagardo dastaketa, ondoren. Sagardo lehiaketa Maialen Lujanbio eta Unai Agirre bertsolariek girotu zuten. Horren ostean, kontzertu mundialak antolatu zituzten goizeko ordu txikiak arte: Azalera, Itziarren Semeak, Bad Sound System eta DJ Elizkoiak. Festa Batzordeak aurten akanpatzeko aukera jarri zuten Torre etxeko atzeko zelaian. Hamaika izan ziren gaua bertan pasa zutenak. Parranda mundiala izan zen auzoan eta eguna argitu arte dantzan ibili ziren bertaratutakoak.

Igandean goizean auzoko hildakoen omenez meza egin zen gurutzean eta horren ostean tortilla txapelketa.

Arratsaldean, aldiz, kronoeskalada. Urteroko zita garrantzitsua izaten da eta haurrak urte guztian entrenatzen dute Ozentzio kalea bizikletaz igotzeko. Hiru maila izan ziren. Lehenengoan Juanene baserriraino egin zuten, bigarren adin tartekoek Etxe Nagusiraino eta helduenek, berriz, Estratabururaino. Gainera, saria ematera Oricako Esteban Chavez txirrindularia etorri zen eta haurrek sorpresa ederra hartu zuten. Arratsaldeko 19:00etan artzai txakur lehiaketa izan eta erakustaldi ederra eman zuten. Auzotarrek, beste behin ere, bokata goxoak afaltzeko aukera izan zuten eta afalostea Irati Odriozola, Ane Badiola eta Joxe Leon Kazabonek alaitu zuten haien musika eta kantuekin.

Atzo, Gorriti Show eta moto erakustaldia izan ziren Beheko Soroan. Gau aldean Mirari Martiarenaren eta Joxe Migel Lopezen bakarrizketa. Gaur, berriz, erromeria izango da eta egun osoko egitaraua antolatu dute auzoko gazteek: Idi-dema, herri kirolak, bazkaria, bingoa, Bide Batezen kontzertua... Suzko zezena ere gaur aterako da eta kalejirarekin bukatuko dira festak.

Contenido Patrocinado

Fotos

Vídeos