Irati Zabala, Euskal Herriko txapeldun bikoitza eskaladan

Irati Zabala Mujika, podiumean. /  GOIZARIN
Irati Zabala Mujika, podiumean. / GOIZARIN

GOIZARINOIARTZUN.

Irati Zabala oiartzuarra protagonista nagusia izan da Iruñako Rokopolis eskalada gunean jokatu den Euskal Herriko Txapelketan. Izan ere kirolari gaztea nagusitu da azkartasuna eta zailtasun modalitateetan, senior kategorian. Hortaz, txapeldun bikoitza izan da Zabala.

Oiartzuarrak txapelketa bikaina osatu zuen eta oso pozik amaitu zuen lortutako markarekin, Espainiako txapelketara joateko txartela eskuratu baitu horrela.

Nolanahi ere, Zabalak badaki zer den podiumera igotzea. Izan ere, 2018an Euskadiko txapelduna izan zen 20 urte azpiko kategorian. Era berean, Espainia mailako brontzezko domina eskuratu zuen 2018ko ekainaren 9-10ean zailtasun handiko eskalada kopan, Zaragozan. Bestalde, bigarren fasean, Bartzelonan, uztailaren 1eko aste bukaeran brontzezko domina lortu zuen berriz ere. Aurtengo otsailean, berriz, Euskal Herriko boulder txapelketan oiartzuarrak hirugarren postua eskuratu zuen.