Intxixuak, sorginak eta basandreak gurean, Ihoteak prest!

Ihoteak direla eta, herriko dendak hasi dira girotzen. / GOIZARIN
Ihoteak direla eta, herriko dendak hasi dira girotzen. / GOIZARIN

Burrunbaa! Ihoteei deiarekin lehertuko da festa, gaur eta Herriko Ihote Taldeak zakuz janztera eta auzoetako banderak jartzera animatu du

GOIZARIN

Intxixuak, sorginak eta basandreak Aiako Harrian bizi dira, bertako kobazuloetan, zelaietan, erreketan. Urtean behin, ordea, herrira jaisten dira eta Udaletxea hartzen dute. Ostiraletik igandera bitarte, eurak dira herriko nagusiak.

Zortzi intxixu etortzen dira eta bakoitzak auzo bat ordezkatzen du. Intxixuekin batera, sorginak eta basandreak ere jaisten dira. Mendian bizi diren sorginak dira Legarretik beheiti jaisten direnak, zortzi, Intxixuak bezala. Behin herriko plazara iristen direnean, kaleko sorginekin elkartzen dira. Kaleko sorginak gure herriko baserrietan bizi diren sorginak dira, mendiko sorginak baino apainagoak, dotoreagoak.

Intxixuak zakarrak eta baldarrak dira, baina oso jentilak, bihotz onekoak. Ehiztari bikainak dira eta naturarekin elkarbizitzan bizi dira. Sorginak ere bihotz onekoak dira historia liburuetan eta abesti zaharretan kontrakoa esaten bada ere. Oso azkarrak dira eta jakintza handia daukate naturaren inguruan.

Aurten ere aukera edukiko dugu intxixuekin eta sorginekin asteburua pasatzeko. Gaur gauean, bandera jarriko dute Udaletxeko balkoian. Hortik aurrera, herrian ibiliko dira. Larunbatean, auzoetan kuestazioan ibiltzen diren herritarrekin paseatuko dira. Kuestazioan poxpolinez jantzi eta etxez etxe, baserriz baserri dantzan ibiltzen dira auzotarrak. Etxe atariak errazten dituzte izpiritu txarrak usatzeko eta eskean aritzen dira giro alaian.

Igandean ere herrian ibiliko dira Intxixuak, sorginak eta basandreak, ilunabarrean udaletxetik bandera kendu eta agur esaten diguten arte.

Gaurko egitaraua

Gaur, arratsaldeko 16:45ean lehertuko da festa. Beheko plazako biribilgunetik abiatuko da Burrunbaaa!, Ihoteei deia egiteko. Batukada moduan, Doneztebe plazara igoko dira haur, gazte nahiz helduak, giro bikaina jarriz herriko bazterretan. Plazan, gero, txokolate gozoa eskainiko dute, indarrak berreskuratzeko.

Horren ondoren, plazaren apainketari helduko zaio. Eta festak aurrera jarraituko du Azeri -eta Sorgin- dantzarekin, 19:00etan. Ordu erdi beranduago Intxixuek, Sorginek eta Basandreek plaza hartuko dute eta auzoetako banderen igoera izango da. Gero, tabernaz taberna poteoa, denak zakuz jantzita.

Goza dezagun denok Intxixuez eta sorginez! Eta haiek ere eroso senti daitezen, jantzi dezagun denok zaku mozorroa! Hortaz, ... beti gau ta egun, gora dezagun! Oiartzun, gogor erantzun!!!

Ihoteen historia hobeto ezagutzeko, sorginen, basandreen eta intxixuen inguruan dena jakiteko Ihoteen ipuinak liburua argitaratu dute eta Urrats dendan dago salgai, 6 euroren truke. «Liburu horrek xehetasun guztiak kontatuko dizkigu herriko asteburu magikoaren inguruan», adierazi dute Ihote taldekideek. «Altxor zoragarri hori zuria izan daiteke. Animatu!». Gora Ihoteak!