Hiru oiartzuar Austriako Europako segalari txapelketan

Jon Otegik goiko posturen bat lortzeko itxaropena du./KOXKO
Jon Otegik goiko posturen bat lortzeko itxaropena du. / KOXKO

Bixente Mitxelena, Jon Otegi eta Julen Mitxelenak Euskal Herria ordezkatzen dute beste hainbat segalarirekin batera

KOXKOOIARTZUN.

Astelehen arratsaldean abiatu zen Euskal Herriko espedizioa Austria aldera, Sharding herrira, hain zuzen. Bixente Mitxelena, Jon Otegi eta Julen Mitxelena oiartzuarrek beste hainbat segalarirekin batera Euskal Herria ordezkatuko dute. Atzo, aurkezpena eta zozketa egin zuten eta gaur hasiko dira lehian, postu onen bat lortzeko asmotan. Azken txapelketan taldekako hirugarren postua lortu zuten euskaldunek, hortaz, aurten, «lortutako postuari eustea edo hobetzea dugu helburu» aitortu digu Jon Otegik. Euskal Herriko taldea osatzen dute sei emakumek, hamar gizonek eta hiru gaztetxok. Euskal Herriko txoko ezberdinetako segalariak dira, besteak beste, Zaldibiarrak, Asteasuarrak, Urnietarrak, Errezildarrak, Lizartzarrak, Leaburuarrak... eta noski, oiartzuarrak.

Aurkari gogorrak izango dituzte euskaldunek. Segak, Euskal Herrian ez ezik garrantzi handia du bestelako herrialdetan. Horren adibide dira, Europako Txapelketan parte hartuko duten herrialdeak, hurrenez hurren, Suitza, Alemania, Hego Tirol, Eslobenia, Eslobakia, Txekia, Ingalaterra eta Austria. Otegi oiartzuarrak adierazi digunez « Suiza eta Austria dira herrialde indartsuenak».

Txapelketa hau, 1969an jokatu zen lehen aldiz. Hasieran, alpeetako herrialdeen arteko lehiaketa zen soilik, baina, pixkanaka, herrialde ezberdinak hasi ziren bertan parte hartzen. Euskal Herriak 1997az geroztik hartu du parte. 2005. urtean izendatu zuten txapelketa hau Europako Txapelketa gisara.

Abiadura eta txukuntasuna

Lehiaketan abiadura eta txukuntasuna hartzen dira kontuan nagusiki. Mutil gaztetxoek 5x7 metroko belar saila ebaki beharko dute eta neska gaztetxoek, 5x5 metrokoa. Aldiz, gizonezkoek 10x10 metroko saila ebakiko dute eta eakumezkoek 5x7 metrokoa.

Gaur arte, Euskal Herriko taldeak lortu dituen emaitza aipagarrienak hiru izan dira, 1999an Izaskun Larrartek lortutako lehen postua, 2009an Joxe Gabirondok lortutako hirugarren postua eta 2017an Jexux Mari Goenagak lortutako bigarren postua.

Almitza segalari elkarteko kideek zita honen garrantzia nabarmendu nahi izan zuten, Euskal Herria ordezkatuko duten segalariak aurkeztu zituzten egunean. «Urteko Europako nazioen arteko herri kirol ekitaldi mediatikoena» izango dela adierazi du Almitzako Garikoitz Lobregatek.

Euskal taldea igandean ailegatuko da Euskal Herrira.