Herri bazkaria eta danborrada gaur Arragua auzoko festetan

Auzoko edadetuek giro apartaz ospatu zuten bazkaria. /  GOIZARIN
Auzoko edadetuek giro apartaz ospatu zuten bazkaria. / GOIZARIN

GOIAZARIN OIARTZUN.

Festarako gogoa daukanak Arragua auzora jo beharko du asteburu honetan. Izan ere, Oiartzun bailarako lehen jaiak giro paregabean ospatzen ari dira bertan. Atzo, jubilatuen bazkariarekin eman zioten jarraipena aurreko asteburuan hasitako festei. Giro aparta zegoen Aldeguna elkartean. Denera, 40 jubilatu elkartu ziren propio prestaturiko bazkari goxoa dastatzera. Ederki bazkaldu ondoren, eta jarduna ezin hobeto bukatzeko, kantari aritu ziren trikitiaren laguntzaz. Dantzarako tartea ere hartu zuten eta arratsaldeko 18:00etan bota zuten suziria. Ondorengo ikuskizunetan ere bildu zen auzotar ugari, baita kanpotik etorritako mordoxka ere.

Gaur goizeko 10:00etan hasiko da festa giroa auzoan, trikitilarien dianarekin. Gero, Haurtzaro Ikastolako dantzarien eta bertsolarien ikuskizuna izango da frontoian. Herri bazkaria ere ez da faltako, 14:00etan. Egunak, ordea, emango du besterik. Zozketak, sariak, bingoa...

Arratsaldeko 19:00etan auzotarren eskutik Danborrada izango da. Gero, afaria eskainiko dute frontoian, indarberritzeko. Azkenik, DJ XAB-arekin dantzaldia izango da... nekatu arte.