Giro ederra Oiartzun irratiaren XX. urteurrenean

Tio Teronen semeek jendetza bildu zuten plazan. /  KOXKO
Tio Teronen semeek jendetza bildu zuten plazan. / KOXKO

KOXKOOIARTZUN.

Larunbatean ospatu zuten Oiartzun Irratiaren XX. urteurrena. Jende ugari ibili zen egun guztian zehar, irratiak prestatutako egitarau oparoari merezitako erantzuna emanez. Irratiko kideek esan dutenez: «oso gustura geratu ginen festarekin, jende asko hurbildu zen eta guztia ederki atera zen!».

Goizeko hamarrak aldera, Oidultz dultzaina taldeak eman zion hasiera jardunaldiari. Doneztebe plaza, gazteek beteranoen aurka jokatu beharreko desafiorako prestatzen zuten artean, haurrek, jolasean ibiltzeko astia izan zuten, puzgarri eta margo artean. Herri kirol 'desafiyua' gazteek irabazi zuten, beteranoen madarikazio artean. Ikusle nahiz irratiko esatarien animo eta oihuek gutxirako balio izan zuten, gazteen indarra erraz gailendu baitzen beteranoen esperientziaren aurrean. Bazkaltzen hasi aurretik, Olarri dantza taldeak dantza saio eder bat eskaini zuen, plazan bertan. Dantzariak txalo artean agurtu ostean, kontzejupean prest zeuden mahietan eseri ziren guztiak. Marmitakoarekin bapo geratu ziren. Bazkalostean, lehenik, herriko bertsolariak gogotsu aritu ziren, Iraitz Mateo eta Josu Ibarguren; gai jartzailea Jon Diaz de Mendibil izan zen.

17:30ean, jai giroa puri-purian zela, eguneko ekitaldi arrakastatsuenetako baten txanda izan zen, Tio Teronen semeak dantza taldearena, hain zuzen. Sekulako originaltasunarekin, pasioarekin eta umore onarekin uztartu zuten euskal dantza. Zeresan handia eman zuen, beste askoren artean, oiartzuarrek osatzen duten talde honek. Amaiera biribila eman zion Hipatia lorategian Lartaun abesbatzak eskaini zuen kontzertuak, gaueko hamarrak aldera. Honenbestez, egun handia izan zen bai Oiartzun Irratiko kideentzat baita oiartzuarrentzat ere.